Pacquiao-Horn fight kompirmado: Arum
KOMPIRMADO na nga ang masunod nga ikasangka ni Senator ug legendary Manny Pacquiao mao ang Australian prospect nga si Jeff Horn. Si Dean Lonergan ug ang Duco Events gikatakda nga mo-anunsyo sa maong panagsangka nga gihulagwayng maoy pinakadakong boxing event sa Australia.
Human sa panagtagbo didto sa Las Vegas tali sa promoter ni Pacquiao nga si Bob Arum ug sa promoter ni Horn nga si Lonergan, ang duha ka kampo nagkasabot nga sa press conference sa Regatta Hotel sa Brisbane pormal ipahibawo ang nakab-ot nga kasabutan.
Gusto ni Horn nga adto sa Suncorp Stadium sa Brisbane ipahigayon ang away nga posibling ipahigayon sa Abril 23 apan alang kang Lonergan nga bisan asa kini ipahigayon basta mokita lang og ensakto.
Ning maong kalambuan, ang kampo ni Pacquiao mipasidaan nang daan nagdto sa 28 anyos nga Horn nga natuman man tuod ang iyang damgo apan mahimo kining usa ka urom.
Apan ang kanhi maestro kinsa lumad nga taga Brisbane mihulagway nga sa uwahing mga away ni Pacquiao makita ug maobserbahan nga nagkaminus na kini.
Giangkon man tuod nga biya kaayo siya sa away apan ang iyang kahigayonan sa kadaugan mao nga iyang masakpan ang 38 anyos nga Pacquiao ibabaw sa ring.
Si Horn wala pay pildi sa 17 ka professional fight, lakip na niini ang iyang pag-knockout sa South African nga si Ali Funeka. Niadtong higayona si Arum diha sa ringside sa Auckland nga nakasaksi.
Kadto maoy nakapaagni ni Arum sa kanhi magtutudlo ug 2012 Olympian nga kini adunay kapabilidad nga sama sa uban makakuha usab og mga dumadapig sa Estados Unidos.
Si Pacquiao, nga may 59-6-2 nga baraha, mao karon ang kampyon sa WBO welterweight division sa ikatulo nga higayon sa dihang iyang gipildi si Jessie Vargas niadtong Nobiyembre.
Iyang gi knockout si Miguel Cotto niadtong 2009, apan sukad niadto wala na siya makatilaw pa og knockout nga kadaugan.