DEAR Noy Tikyo,
Maayong adlaw! Magbasahan ko sa imong lindog kaniadto pa. Wala ko magdahom nga moabot ning higayona nga magpatambag sab ko nimo sa akong suliran.
Tawaga lang ko sa ngalan nga Bernard. Ang akong problema bahin ning akong uyab karon.
Sa dihang tua pa ko sa layo nagtrabaho, nakasala siya sa among relasyon. Apan tungod lagi nga love kuno ko niya, nangayo siya og pasaylo ug ako sab nga gipasaylo.
Karon nia na ko sa Davao. Sa pirmiro, nagtuo ko nga mahapsay na ang among relasyon kay duol na mi sa usag-usa.
Apan naunsa man nga magsige na man hinuon mi og away. Kay dunay lalaki nga naay anak apan walay asawa, naibog niya.
Unya imbis nga molikay siya, magsige na man hinuon og pakig-istorya sa lalaki.
Karon nakadungog nako nga uyab na sila. Mao nga nagbungol mi ug wala na mi magtingganay.
Wala na pod ko ganahi niya sa iyang gibuhat nako. Gusto na kong magbuwag mi sa hingpit.
Unsa kahay imong hunahuna niini, Noy?
rBernard
*****
Bernard,
Angay nimong klaruhon ang imong nadunggan nga istorya bahin sa panag-uyab nila sa minyo nga lalaki.
Sa akong pagsabot, nadungog ra nimo ang istorya gikan sa laing tawo, busa wala kay igong ebidensya kon unsa kini ka tinuod.
Mas maayong imo ning susihon aron nga makakuha ka og first hand nga information aron sa pagtino sa kamatuoran niini.
Lisud man kon mo-react ka dayon nga wa pa nimo maklaro ang tanan. Mas nindot kon makig-istorya ka sa imong uyab inay nga di nimo tinggan.
Pinaagi niini makuha sab nimo ang iyang habig kay basin og di gayud diay tinuod ang tanan.
Apan kon ugaling dunay kamatuoran, aw, ikaw na ang mag-igo kon imo ba siyang buwagan sa hingpit.
Kon wala ka nay pagbati niya, angay sab nga sultihan nimo siya niini. Dili nang imo lang siyang bungulan.
Kon gusto kang makigbuwag, sultihi siya sa tinuod aron nga klaro para ninyo ang tanan. Di lang nga kalit ka lang di motingog niya.
Mas maayo nang magbuwag mo sa maayong kabubut-on.
Magrespetuhay mo sa inyong mga desisyon.
rNoy Tikyo