Druglord nagpaluyo sa pag-atake sa NCDJ

KIDAPAWAN CITY -- Usa ka drug lord ang maoy mipaluyo sa pag-atake sa North Cotabato District Jail (NCDJ) sa Barangay Amas ning dakbayan.

Kini ang gikompirma ni North Cotabato acting Governor Shirlyn Macasarte Villanueva.

Matod sa gobernadora nga nagbayad og usa ka milyon ka pesos ang drug lord nga priso nga si Melvin Casangyao, alyas Hapon, kang Esmael Nasser, alyas Kumander Derby, aron siya luwason sulod sa prisohan.

Samtang dugang usa ka milyon ka pesos sab ang ibayad ni Casangyao kang Kumander Derby kon magmalampuson siya nga makapuga sa NCDJ.

Giklaro ni Villanueva nga dili mga high profile inmates ang target nga i-rescue sa pag-atake sa NCDJ apan si Casangyao nga usa ka drug lord.

Kadaghanan sa nakapuga nga mga priso, 94 niini dunay kasong kalapasan sa Republic Act 9165 o Comprehensive Dangerous Drug Act of 2002.

Samtang nagpagawas na sab og reward money ang kagamhanang probinsyal sa North Cotabato batok sa mga prisong miikyas ug sa grupo ni Kumander Derby.

Usa ka milyon ka pesos nga patong sa ulo ni Kumander Derby ug Melvin Casangyao samtang napulo ka libo ka pesos sa mga priso nga miikyas sa NCDJ gikan sa lokal nga panggamhanan sa probinsiya.

Nagdugang sab og tag-P1 milyon si Interior and Local Government Secretary Mike Sueno kang Kumander Derby ug kang Casangyao samtang dunay napulo ka libo ka pesos sa mga priso.

Nagkahiusa ang mga miyembro sa Sangguniang Panlalawigan sa North Cotabato nga gipangulohan ni Board Member Rolly Sacdalan nga mohimo og lakang aron pakusgon pa ang seguridad sa mga prisohan ug sa katawhan sa probinsya.

Sa pagkakaron, nagpadayon ang crackdown operation sa militar ug kapolisan batok sa grupo ni Kumander Derby ug sa mga priso nga pugante.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph