NAPULO ka mga opisyal sa barangay sa Davao City ang gipailawom sa surveillance human alegasyong nalambigit sa gidiling droga.
“Napulo sila kabuok nga mga opisyal sa barangay sa Davao City. Under monitoring sila karon sa atong Intel branch,” sulti ni Davao City Police Office (DCPO) spokesperson Catherine dela Rey.
Ang pahayag sa opisyal miguwa human migawas ang listahan sa Intelligence Branch sa DCPO nga dunay napulo ka mga opisyal sa barangay sa dakbayan ang nalambigit sa illegal drugs.
Giingon ni Dela Rey nga gibutang ang napulo ka opisyal isip mga high value target (HVT) sanglit opisyal sila ug nanerbisyo sa katawhan.
“HVT sila ug kung dili sila mohunong ma-buybust sila, ug kung mosukol, mamatay gyud sila,” dugang sa opisyal.
Sa kasamtangan nga Project Double Barrel Alpha sa kapolisan, gikan Oktubre 26, 2016 hangtod niadtong Miyerkules, Enero 11, ang DCPO duna nay natala nga 188 ang nasikop, 1,076 ang mitahan, 10 ang napatay, 126 ang gipailawom sa drug bust gikan sa 149 ka operations ug dunay 26,659 ang nabisita sa mga pulis sa balay sa gituohang mga pushers ug users.