WA gyud gihapon masulbad ang lunop ug baha dinhi sa Sugbo. Wa man gyud hinuon ako magpaabut nga masulbad gayud sa hingpit ang maong suliran apan subo nga palandungon nga bisan ang mga dapit nga gigastuhan nag dakong salapi sa gobiyerno aron sulbahon ang suliran sa lunop ug baha nagpabilin gihapon ang maong problema.

Usa ka ehemplo niini mao ang drainage problem sa A. S. Fortuna street diin gitrabaho ang imbornal sa maong dapit nga migasto og ginatus ka milyon ka pisos.

Ang mga tawo nga nagpuyo sa maong dapit miingon nga ilang gi-agwanta ang kadugay sa pagtrabao sa maong drainage project tungod sa pagtuo nga dili na unya sila mag-antus sa lunop og baha kon mahuman na kini. Tuod man nahuman kini apan misamut og kagut ang ngipon sa katawhan tungod kay molonup gihapon kini panahon sa uwan.

Kahibawo man ko nga bisan ang adunahang mga nasud sa kalibutan lunupan man gihapon apan dili sama dinhi sa ato nga magbalikbalik ang trabaho apan mao lang gihapon ang resulta.

Atong nasayran nga gawas sa pagpatakag labay sa basura ug ang kabalayan nga gitukod sa daplin sa kasapaan, usa usab sa hinungdan sa lunop mao ang tubig nga dili makaguwa ngadto sa dagat panahun sa taub.

Adunay mga sugyot nga butangan og babag ang mga bukana kun baba sa kasapaan dayon ngadto sa dagat. Mahimo kining sirhon panahon sa taub ug ibomba ang tubig ngadto sa dagat. Kinahanglang maapil kini sa integrated drainage plan sa Metro Cebu.

Patyon kon di mo-resign

Atong tan-awon og unsay tinuod nga ma­hitabo niining mga mayor nga anaa sa listahan sa mga nalambigit sa iligal nga drugas.

Miawhag si Presidente Duterte nga kinanghanglan silang mo-resign sa ilang katungdanan kay kon dili, iya kining patyon. Mahimo ba kini sa presidente?

Kon dili gayud mo-resign ang usa ka mayor nga anaa sa druglist, mahimo kining pasakaan og sumbong ngadto sa hukmanan apan dili kini niya mapugos sa pagpapahawa sa pwesto without due process.

Kining pagpatay kanila ambot og unsaon pagpaagi sa presidente ang pag-ihaw kanila. Mitiyabaw man gani ang ubang mga kongresista, senador ug human rights group sa dihang gipatay sud sa iyang selda si Albuera, Leyte Mayor Rolando Espinosa?

Mahimong hudlat ra kini sa presidente apan makahatag hinuon kini og kahadlok ngadto sa mga hingtungdan. Makapaabot ba kita og usa ka mayor sa Sugbo, kon dili niya makumbinsir ang presidente nga wa siyay sala, ang usa sa mga maihaw? Ambut!

(msr1144@yahoo.com)