HUMAN nauyonan sa kagamhanan sa lalawigan ug siyudad sa Sugbo ang pagpahigayon og land swap deal alang sa kasulbaran sa 93-1 issue, si kanhi Cebu gobernador Pablo Garcia, namahayag nga dakong alkanse ang Kapitolyo sa maong transaksiyon.

Gihulagway niya nga wa’y bili ang mga luna nga gibaylo sa siyudad kon itandi sa mga luna ubos sa 93-1, nga gikan sa Kapitolyo.

Alang ni Pabling, daw ‘tulis sa udtong tutok’ ang nauyonang pagbinayloay og luna sa probinsiya ug siyudad alang sa pagsulbad sa 93-1 issue.

Base sa nauyonan nga land swap deal, ihatag sa Kapitolyo ngadto sa siyudad ang 32.4 hecatres nga lu­na ubos sa 93-1 ordinance, nga anaa sa 11 ka mga barangay sa dakbayan.

Sigun ni Garcia, kon basehan ang 2008 appraisal sa maong mga luna, nagkantidad kini og P3 billion ug posibleng anaa na sa P12 bilyones ang kantidad niini karong panahona.

Gawas sa 93-1 lots, lakip sa ihatag sa Kapitolyo ang gihulagway nga laing prime lot nga mao ang 1.5 hectare lot sa DA compound sa M. Velez, nga gibana-banang nagkantidad ug P1.5- P2 billion, ingun man dunay duha ka gagmayng luna nga anaa sa Don Gil Garcia St. ug Lahug sa dakbayan sa Sugbo.

Bugti niini, lima ka mga lote ang ihatag sa siyudad ngadto sa probinsiya apan sigun ni Garcia, ang luna sa wala na gigamit nga sewerage treatment plant sa North Reclamation area ug ang 2.5 ektar­ya sa SRP mao ang mapuslan.