UWANON ang masinati sa Sugbo karong adlawa hangtod sa Lunes sa sunod semana, matod sa Philippine Atmospheric, Geophysical and Astronomical Services Administration (Pagasa).

Si Alice Canasa, weather specialist sa Pagasa Visayas, niawhag sa mga moapil sa ‘Walk with Mary’ ug Traslacion, nga magdala og payong, raincoat, jacket ug ubang pangsagang sa ulan sanglit madag-umon ang kalangitan uban sa hinay ngadto sa kasarangan nga mga pag-ulan ug thunderstorms ang masinati sa Sugbo karong adlawa.

Hangtod sa Enero 16 pa masinati ang pag-ulan sa Sugbo.

Alas 3:00 sa kaadlawon, ang imahen sa Birhen sa Guadalupe iprosesyon gikan sa Archdiocesan Shrine of Our Lady of Guadalupe sa Barangay Guadalupe, siyudad sa Sugbo paingon sa Fuente Osmeña rotunda, ug pagka alas 4:30 sa kaadlawon, sugdan ang ‘Walk with Mary’ padung sa Basilica.

Isunod ang misa sa pilgrim center pag-abot sa imahen sa Birhen ug human sa misa isunod ang Traslacion.

Bantay

Dul-an sa 800 ka mga pulis, military ug tanod ang ipakatap sa kadalanan sa dakbayan sa Mandaue alang sa Traslacion karong buntag.

Samang gidaghanon usab sa mga bantay ang ipakatap sa foot ug fluvial procession ugma.

Kini maoy gibutyag ni PSSupt. Alberto Alanas, hepe sa Mandaue City Police Office (MCPO) sa dihang nahinabi sa mga tigbalita kagahapon.

Matod ni Alanas nga sukad usab kagahapon, gipaubos sa red alert ang kapulisan sa dakbayan hangtod Enero 19.

Devotee City

Karong adlawa, buksan ang Devotees City nga mapuy-an sa 3,000 ka mga tawo.

Bisan karong adlawa pa buksan, duna nay mga namuyo sa mao nga dapit nga nahimutang sa may Compania Maritima, duol sa Cebu city hall.

Samtang Metro Cebu Water District mo-supply og libreng tubig sa mao nga pasilidad.

Mobutang usab sila og upat ka water stations sa rota Solemn Procession diin tubig libre.

Kini anha ibutang sa Osmeña Blvd. atubangan sa Sony Service Center, Osmeña Blvd. atubangan sa Silver Dollar Restaurant, Gen. Maxilom Ave. tapad sa Mango Park Hotel ug New Imus Road eskina San Miguel St.

Atol sa Grand Parade karong Domingo, Enero 15, ang MCWD mopahimutang ug 10 ka water stations sa rota sa parada.

Upat ka water stations ipahimutang sa Gen. Maxilom Ave. atbang sa old Sacred Heart for Boys; eskina San Jose Ext.; eskina Felimon Sotto St. ug atubangan sa St. Theresa’s College (STC).