USA ka high-value target nga drug pusher ug iyang tulo ka mga kauban ang nasikop sa National Bureau of Investigation niadtong Martes, duol sa usa ka tunghaan sa dalan Katipunan, brgy. Labangon, dakbayan sa Sugbo.

Gisusi pa sa NBI ang mga taho nga sakop ni anhing Jeffrey Diaz, alyas Jaguar, si Ronald Arquillano, 42.

Giingong gawas sa pagpamaligya og illegal drugs, nag-operate si Arquillano og drug den duol sa usa ka tunghaan sa brgy. Labangon.

Gawas kang Arquillano, lakip sa nasikop sa buy-bust operation mao silang Christopher Tautho, Charleston Lunday ug Jommel Sarvida, nga giingong mga kaabag niya sa negosyo, isip tig-repack sa drugas.

Matod ni NBI7 regional director, Patricio Bernales, Jr., gisusi pa nila ang mga impormasyon nga nagtumbok kang Arquillano isip sakop sa napatay nga number 1 drug personality sa Central Visayas nga si Jaguar.

Nihimo sa buy-bust operation ang NBI human makadawat og taho nga nagsige og baligya og drugas si Arquillano sa dapit.

Ilang nasayran nga dinagko ang iyang mga transaksiyon.

Nakuha gikan kanila ang duha ka medium pack ug tulo ka gagmyang pakete sa gidudahang shabu, gibana-banang nagkantidad og P100,000.

Hugot hinuong gihimakak ni Arquillano nga iya ang negosyo sa pagbaligya og drugas. Matod niya, igo lang siyang sugo-sugoon sa usa ka “Edmund”, nga taga-B. Aranas, sa pagpalit og drugas sa dan A. Lopez.

Mosanong siya tungod usab sa kawad-on ug aron dunay ibuhi sa iyang mga anak.

Giangkon niya nga mogamit hinuon siya og ginadiling drugas.

Ang mga dinakpan nga silang Sarvida ug Tautho niingon nga wa silay labot sa negosyo ni Arquillano.

Si Sarvido, matod pa, igo lang nibisita kang Arquillano samtang si Tautho naningil og utang.

Kasong kalapasan sa Dangerous Drugs Act ang ipasaka batok sa mga dinakpan samtang dugang kaso sa ilegal nga paghupot og armas ang ipasaka batok kang Arquillano kay nakuhaan og armas de fuego atol sa operasyon.