MIABOT sa 14 ka mga pagdahili sa yuta ang natala sa bukirang bahin sa dakbayan sa Sugbo niadtong Miyerkules tungod sa mga pag-uwan sa nakalabay nga upat ka mga adlaw.

Ang pangu sa City Disaster Risk Reduction and Management Office (CCDRRMO) nga si Nagiel Bañacia nagkanayon nga unom ka nagkadaiyang mga pagdahili sa yuta ang nasuta sa Barangay Mabini ug tulo sa mga Barangay Adlaon.

Aduna usay landslide nga natala sa Barangays Sudlon I, Pulangbato, Busay, Budlaan, Agsungot ug Malubog.

Ang pagdahili sa yuta nakababag sa bahin sa dalan sa maong dapit apan walay balay nga apektado.

Dugang ni Bañacia nga ang labing lapad nga pagdahili nga ilang natala mao ang sa Sitio Tanay, Pulangbato tungod kay ang tibuok dan ang nababagan niini.

Gibutyag usab niya nga ang quarry operation sa PLD Construction sa maong dapit nakatampo sa nahitabo nga landslide.

Sa pagkakaron dili pa maagian ang dan niini tungod kay wa pa usab kini nila hilabti tungod sa kahumok sa yuta.

Huwaton una nila nga mouga kini sa di pa mahawanan ang dapit.

Hinuon, aduna’y laing dan nga mamahimong magamit paingon sa Pulangbato.

Sa Barangay Mabini, matod ni Bañacia, nga kadtong pagdahili kilid sa dan maagian ra hinuon sa four-wheeled vehicles.

Samtang ang ubang dapit na-clear na sa CCDRRMO.

Gitug-an usab ni Bañacia nga sa mga nagkadaiyang pagdahili sa yuta sa bukirang barangay, nagkadaiyang hagit usab ilang nasinati.

Usa niini nga maghuwat pa ang barangay sa city responders diin ila unta kini angay nga res­pondehan.

Base sa disaster management law, mosulod lang ang kagamhanan sa dakbayan kon tulo ug pataas na ka sitio ang apek­tado, gawas usab kon dagko na kini nga landslide.

Hangyo niya sa 80 ka barangay nga mopalit og kaugalingon nila nga chainsaw aron magamit sa panahon nga aduna’y bati nga panahon diin unang maapektohan kining mga kahoy.