GIPAHIBALO ni Social Security System (SSS) assistant vice president and officer-in-charge for Northern Mindanao Division Edwin Alo nga posibleng sa bulan sa Pebrero ning tuig madawat sa mga pensioner ang P1,000 nga dugang pension.
Dugang ni Alo nga tungod kay niaging Martes, Enero 10, lang giaprobahan ni Presidente Rodrigo Duterte ang maong usbaw, posibleng moepekto kini sa bulan sa Pebrero.
Ang makadawat niini mao ang mga pensioner ug walay pili niini.
Sa tuig 2019 ngadto 2022, posibleng madawat ang laing usa ka libo nga usbaw.
Tungod usab sa report nga sugod sa bulan sa Mayo, adunay pag-increase sa contribution sa mga empleyado daghan ang misupak niini ug mitiyabaw kay basin unsa dako na kaayo ang bayrunon.
“Basta gani increase sa pension wala gyod mosupak ana, pero increase sa contribution daghan gyod reaksyon,” matud ni Alo.
Hinuon gipasabot niini nga 1.5 porsiyento lamang gikan sa 11 porsiyento ang dugang nga bayrunon sa contribution.
Panaglitan niini nga kon adunay bayrunon ang empleyado nga P110 matag bulan sa contribution sa SSS, mahimo na kini og P120 kapin sugod sa bulan sa Mayo ning tuig.
Gipasabot usab niini gikinahanglan gayud ang usbaw sa contribution tungod kay ilang paninguha nga i-preserbar ang kinabuhi sa ahensya sa umaabot pang katuigan.