ANG NCCC B3 magpahigayon og Inter-High School Table Tennis mixed double tournament nga kabahin sa pagsaulog sa Chinese New Year sa Enero 22 sa NCCC B3 Center Lanes.

Kini ang gipahibawo ni NCCC B3 officer-in-charge for operations Antonio Venculado Jr. atol sa Davao Sportswriters Association (DSA) Forum sa NCCC Mall Food Cove Function Hall Huwebes, Enero 12.

Sumala ni Venculado nga kini abli alang sa tanang junior ug senior high school students apan gilimitahan lang sa 12 ka tims nga makarehistro.

Dugang niya nga ang tunghaan mamahimong magpadala og duha ka tims nga gilangkuban og tulo ka magduduwa nga puwede tanan babaye, lalaki o mixed.

Ang tanang moapil mamahimo lang magdala sa ilang school ID's ug magpalista sa NCCC B3 diin usa kini ka libreng rehistrasyon.

Ang mokampeyon sa kompetisyon mouli og P4,000 samtang ang ika-duha makadawat og P3,000 ug P2,000 sa ika-tulong puwesto.

Samtang ang mga tim nga wala makadaug hatagan og P1,000 sa torneyo nga opisyalan sa pagpangulo ni 2015 Asean Para Games wheelchair table tennis bronze medalist Smith Billy Cartera.

Dugang sa NCCC B3 OIC for operations nga ilang ginalantaw nga mohimo og "tribute" sa mipanaw Presidente sa LTS Retail Specialists, Incorporated nga si Javelin "Javey" Alvarez Lim. (Marizz S. Robilla)