DAVAO DEL SUR -- Gihangop sa mga pensiyonado sa probinsiya ang dugang P1,000 sa binulan nilang pensiyon gikan sa Social Security System (SSS) bisan og diyutay lang.
Sumala sa 62-anyos nga si Marissa Grijaldo, molupyo sa Barangay Zone 1, Sta. Cruz, nga makatabang na kini sa iyang pangpalit og bugas nga maoy gisaligan sa iyang unom ka sakop sa pamilya.
Si Marissa nagdawatan lang og P1,200 nga pensiyon matag bulan ug karong aprobado na ni Presidente Rodrigo Duterte ang balaudnon mahimo na kining P2,200 matag bulan.
Bisan si Felimon Mancao, 65, nga taga Barangay Poblacion Uno sa lungsod sa Bansalan nalipay sab nga mahimo nang P2,500 ang iyang pensiyon matag bulan gikan sa kanhi P1,500 lamang.
Usa sa iyang gilantaw mao ang 13th month pay nga makadoble sa iyang dawaton matag bulan sa Disyembre.
Ang binuwang pensiyon sa mga miyembro sa SSS madawat inig retiro sa trabaho kun nakabayad kini sa binuwang kontribusyon sud sa 120 ka bulan.
Mahimo sab makakobra og lumpsum ang ubang retirado bisan og wa makaabot sa 120 ka bulan apan nisumada sa kinatibuk-ang kontribusyon nga nabayaran niini o sa iyang employer lakip ang interes.
Samtang sa e-mail nga gipadala ni Bayan Muna Representative Carlos Isagani Zarate ug Bayan Muna Chairman Neri Colmenares sa SunStar SuperBalita, gipadayag nila ang ilang pasalamat sa administrasyong Duterte ug sa liderato sa Kongreso nga gipamunuan ni Speaker Bebot Alvarez ingon man sa bag-ong SSS Board nga gipamunoan ni Amado Valdez tungod sa pagtubag niini sa panawagan sa mga pensiyonado nga dugangan ang ilang pensiyon.
Gitataw niini nga dako na kining tabang sa mga senior citizens nga adunay daghang galastuson.
Gisaad sa duha ka magbabalaod nga motabang ang Bayan Muna sa SSS Board nga mangita og paagi nga ma-sustentuhan ang ilang pundo bisan og di na dugangan ang bayad sa binuwang kontribusyon sa mga aktibong miyembro niini. (Orlando B. Dinoy)