ANG Metropolitan ­ Water District (MCWD) padayon sa tinu-ig nga paghatag og libreng tubig mainom atol sa kapista­han sa Balaang Bata nga si Senior Sto. Niño.

Karon Enero 14, atol sa Solemn Procession, ang MCWD mopahimutang og upat ka water stations sa rota sa procession aron paghatag og libreng tubig mainom sa mga deboto.

Kini anha ibutang sa Osmeña Blvd. atubangan sa Sony Service Center, Osmeña Blvd. atubangan sa Silver Dollar Restaurant, Gen. Maxilom Ave. tapad sa Mango Park Hotel ug New Imus Road eskina San Miguel St.

Atol sa Grand Parade karong Dominggo, Enero 16, ang MCWD mopahimutang ug 10 ka water stations sa rota sa parada.

Tulo ka water stations ipahimutang sa Gen. Ma­xilom Ave. atbang sa old Sacred Heart for Boys; eskina San Jose Ext.; eskina Felimon Sotto St. ug atubangan sa St. Theresa’s College (STC).

Usa ka station ibutang sa sulod sa Fuente Osmeña Rotunda ug lima ang ipahimutang sa Osmena Blvd. atubangan sa Nurses’ Home; atbang sa Camp Sergio Osmeña; atubangan sa Silver Dollar Restaurant; atubangan sa Bradford Church; ug atubangan sa Sony Service Center.

Sayon ra tultulon ang water stations tungod kay adunay booth nga adunay dagko nga signage nga ipahimutang.

Ang MCWD padayon usab nga maghatag ug libreng tubig sa Devotee City nga karon ipahimutang sa usa ka bakanteng luna duol sa Cebu City entrance sa South Road Properties.

Karong tuiga, ang Cebu City government mo­pabarug sa Devotee City sugod sa Enero 13 hangtud 16.

Matag tuig, ang mga deboto sa Sto. Niño gikan sa lain-laing dapit gipaabot nga motapok sa dakbayan sa Sugbo.

Gituyo og himo sa Cebu City Government ang Devotee City aron pag­hatag ug kapuy-an niadtong walay ikagasto nga mopuyo sa mga hotel. Kini gituyo usab aron luwas sila ug dili maglibudsuroy sa kadalanan.

Ang Devotee City dunay katulganan, kaligo-an ug pansayan.

Aduna usab mga sponsors nga mohatag ug libreng pagkaon sa mga dumoduong. (PR)