ORMOC CITY, Leyte - Labing dakong pundo alang sa mga proyekto ang i-implementar sa Department of Public Works and Highways (DPWH) sa kwatro distrito sa Leyte.

Ang kantidad mokabat sa P1.8 bilyones nga gibahinbahin alang sa nagkadaiyang proyekto alang sa tuig 2017.

Matod ni District Engineer Lino Francisco Gonzales sa iyang nasayran mao kini ang labing dakong pundo nga ilang nadawat sa kasaysayan sa DPWH sa kwarto distrito.

Ang pundo gibahinbahin sama sa local infrastructure projects nga dunay P60 milyones; pagpalapad sa karsada P350 milyones; flood control projects P250 milyones; off carriageway P400 milyones; Ormoc - Merida - Palompon road widening P200 milyones ug dugang P240 milyones sa Albuera - Burauen road.

Duna usab gipaabot nga laing P500 milyones alang sa flood control projects sa Pagsangaan river sa Barangay Liloan, dakbayan sa Ormoc.

Sa miaging tuig 2016, anaa lang sa P700 milyones ang ilang nadawat nga pundo alang sa mga proyekto.

Sa mga proyekto nga ilang gi implementar sa tuig 2016, school buildings ug health facilities nalang ang wa pa nila ma kompleto.

Adunay 33 ka school buildings ang ilang giimplementar diin 19 ang nahuman na, 11 ang padayun nga gitukod ug upat sa Kananga, Leyte ang wa pa masugdi gumikan sa problema sa lugar nga tukoran.

“62 percent na ato accomplishment (school buildings) and we hope by March mahuman na nato tanan,” matod ni Gonzales.

“Sa mga projects for 2016, 88 percent na ato accomplishment” dugang ni Gonzales.