TAGBILARAN CITY - Sila si Inabanga Mayor Josephine Socorro Jumamoy, Danao Mayor Natividad Gonzaga ug San Isidro Mayor Jacinto Naraga ang wa makatambong sa tigum nga gipatawag ni Pres. Rodrigo Duterte didto sa Malacañang niadtong miaging Miyerkules ngadto sa tanang mayor sa nasud.
Suma sa mga nahipos nga impormasyon giingon nga adunay mga kakulian ug mga nakaplano na daan nga mga lakaw ang mga mayor sa samang adlaw sa wa pa nadawat ang imbitasyon gikan sa presidente.
Giingon nga si Inabanga Mayor Josephine Socorro Jumamoy kasamtangan nga tua pa kini sa Estados Unidos alang sa usa ka bakasyon, si Danao Mayor Natividad Gonzaga giingon nga di maayo ang panglawas samtang si San Isidro Mayor Jacinto Naraga nasakto sa petsa sa kasal sa iyang anak nga babaye.
Nasagmuyo usab ang mga Bol-anon tungod kay pakyas ang ilang tinguha nga hinganlan ni Duterte ang mga mayor nga nahilambigit sa ilegal nga drugas nga napatik sa listahan sa presidente.
Kahinumduman nga atol sa pakighinabi sa dyRD ‘’Inyong Alagad’’ ngadto kang Cabinet Secretary Leoncio Evasco sa wa pa nahitabo ang meeting nga nagbutyag nga posibling hinganlan ni Pres. Duterte ang mga opisyal nga anaa sa listahan lakip na ang paghatag og higayon ngadto sa mga mayor nga gustong motan-aw sa listahan.
Matud pa sa presidente sa League of Municipalities nga si Clarin Mayor Allen Rey Piezas sa pakighinabi sa dyRD nga atol sa panagtapok wa nibutyag ang presidente ug igo lang kini nga nipakita sa baga nga listahan diin giingon nga aduna didto nalista ang mga opisyal sa gobyerno ug gitugtan usab ang tanan nga mitambong nga pwedeng motan-aw sa listahan.