GIPANIGURO sa Provincial Tourism Office (PHO) nga dunay igong seguridad atol sa ilang pagpahigayon sa Suroy-suroy Sugbo sa sunod semana.
Sa pagkakaron, kapin na sa 50 ang mga nakabayad aron pagsalmot niini ug gipaabot nga mapun-an pa kini samtang nagkaduol ang kalihukan.
Sa nasayran, moabot sa 10 ka mga lungsod ang suroyon sa mga partisipante sa Suroy-suroy Southern Heritage Tour karong Enero 18 ngadto sa Enero 20. Gitug-an sa PTO nga sa pagka-karon, anaa na sa 51 ang mga nakabayad aron pagsalmot sa maong kalihukan.
Nunot niini, gipaniguro ni Provincial Tourism officer, Boboi Costas, nga dunay igong seguridad alang sa mga partisipante, nga sagad mga Pinoy balikbayan.
Matod ni Costas, nakig-alayon na sila sa lokal nga kapulisan karon.
Duna sab silay mga police undercover nga magsuot lang og plain clothes, nga motabang pagbantay sa seguridad sa mga partisipante.
Nunot sa kasaulogan sa Sinulog, hugot nga seguridad ang gipatuman sa tibuok Sugbo nunot sa mga ispekulasyon nga posibleng mosiaw ang mga nagtinguha pagtisok og kagubot.
Una na usab nga niluwat og travel advisory ang Amerika batok sa mga dapit sa southern Cebu nunot sa mga posibleng pagpanagit, hinungdan nga dili mokompiyansa ang mga organizer sa Suroy-suroy.
Malaumon si Costas nga moabot pa unya ngadto sa 80 ang mga paying participant sa 3 ka adlaw nga Suroy-suroy, samtang nagkaduol usab ang schedule sa maong kalihukan.
Giila ni Costas nga nakatabang sa paspas nga sales sa tour ang pagmuntar nila ug booth sa usa sa mga mall dinhi sa Sugbo.
Sa pagkakaron, nahan-ay na sa PTO ang tanang detalye sa tour ug nanghinaot kini nga magmalampuson gihapon ang ilang kalihukan sama sa miaging katuigan.