DETERMINADO si ALA fighter Milan Melindo nga kab-uton sa hingpit ang iyang pangandoy sa boksing.

Niadtong Nobiyembre 26 sa Cebu Coliseum, nagmalampuson si Melindo paglangkat og world title human siya napakyas sa nag-una niyang duha ka mga pagsuway. Naangkon niya ang International Boxing Federation (IBF) interim world jr. flyweight belt pinaagi sa unanimous decision nga kadaugan batok kang Thai Fahlan Sakkreerin Jr.

Apan daw adunay haw-ang sa pamati sa gitawag og “El Metodico” ug gusto niyang mailog ang regular IBF jr. flyweight title gikan kang Akira Yaegashi sa Japan.

Wala pa man tuod na­han-ay ang ilang panag-away ni Yaegashi apan hinay­hinay nang nangandam si Melindo alang ning awaya. Gipasabot ni Melindo nga human niya nakuha ang world interim title, wala siya miundang sa pag-ensayo.

Alang kaniya, gusto niyang moumento pa ang iyang abilidad pinaagi sa pag-training og insakto.

Gipasabot ni Melindo, ang iyang labing lig-ong hinagiban sa pagkab-ot sa iyang mga pangandoy mao ang pag-ampo. Alang kaniya, ang Kahistas-an maoy nagpadaog kaniya sa world interim title.

Nidugang si Melindo nga kon makuha na niya ang regular title, gusto siyang moaway sa kampiyon sa ubang world boxing bodies alang sa unification bout.