STA. MARIA, Davao Occidental - Mihimo og feeding ug immersion program ang Municipal Disaster Risk Reduction and Management Council sa pakig-alayon sa Municipal ug Provincial Health Office ug sa Sta. Maria Municipal Police Station, alas 8 sa buntag, adlaw'ng Huwebes, Enero 12.
Gihimo ang programa didto sa Sitio Lilan, Barangay Datu Intan sa dakbayan.
Si Senior Inspector Elinar Agustin, hepe sa kapolisan, niingon nga gipang-apud-apod sab nila ang mga gamit pang-eskuwela, pintura samtang mihimo ang mga personahe sa panglawas og medical check-up sa mga bata ug mga hamtong.
Ang Municipal Health Office ug Provincial Health Office nanghatag sab og mga bitamina sa mga bata ug mga hingkod aron makatabang pagsustento nga molagsik ang ilang panglawas.
Apan wala gipalabay sa kapolisan ang kahigayonan aron i-implementar ang nagapadayong kampanya batok ilegal nga droga mao nga gihimo sab nila ang “Oplan Tokhang” sa lugar.
Si Agustin midason nga pito ka mga drug dependent sa lugar ang boluntaryong mitahan sa ilang kaugalingon.
Malampusong natapos ang usa ka adlaw'ng aktibidades banda alas 5 sa hapon sa susamang adlaw.