SA wa pa ko magsugod sa mountain biking, nagtuo ko nga sayon ra kaayo ni. Apan sa una ko pa lang gani nga pagsakay sa akong unang mountain bike, diha ko naka-realize nga di diay lalim. Pagkat-on pa lang sa kambyada, likod ug atubangan, lisod na.
Ikaduha, ang pagtindak bisan sa patag hangak na. Naabtan kog usa ka oras kapin sa akong pagsikad sa Sunstar padung sa balay sa akong pagdala sa una nakong MTB. Struggle was real. Nagkatawa ko naghuna-huna nga sayon ra ang biseklita ang naa sa akong utok bisan opposite diay.
Mas nisamot ang kalisod dihang nagkat-on ko og saka sa bukid. Kanang pahuway nga kalima, mao nay nahitabo nako kaniadto. Ang tindak nga makuha rag usa ug tunga sa oras niabot og tulo. Didto nako naamguhan nga kat-unan una ang tanan sa di ka pa mangambisyon sa pagsaka og bukid. Gikinahanglan diay ang phases ug stages sa imong pag-andam sa kaugalingon. Way panglaktaw sa mountain biking bisan naa ka sa laing sports.
KULBA
Usa sa akong kahadlukan sa biking mao ang medyo technical nga downhill. Kanang magdulhog ka nga magbantay sa agianan nga dunay rain ruts, dagkong mga bato, lapok nga dangog ug gagmayng bato nga dangog gihapon.
Kuyaw baya nga malamba kay taas ang MTB. Mao nang bentaha kon ang imong seat post lock quick release ang gamiton. Mahimong mapaubsan nimo ang imong lingkuranan. Gawas nga dali kang makapanukod, ang weight usab mabalanse og maayo.
Nakat-on kog gamay sa sigeng kuyog sa akong kaubanan, apan slow gyud ko basta dulhog. Apan kadto laging nag-trail mi, nahimuot ko sa akong higalang si Phukey kay nasuko nga wa ko modulhog nga nagsakay. Half hinuon, napugos kog sakay. Sakto siya, hinayhinay lang, di paspasanaron di masimplang.
CEBU EPIC
Karong sayo kaayo sa buntag, ang akong mga higalang nangapil sa Cebu Epic sayo nga nangmata alang sa lumba nga di lalim ang rota. Naay tungas. Portion niana kanang sa Bonbon nga hapit na mag-abot ang imong suwang ug tuhod nga pwerteng taasa.
Di usab papilde ang mga dulhugon nga duna say technical nga kon imong duwa-duwaan, kuyaw kang mokanaug sa biseklita nga mag-una ang ulo. Hinaut unta nga gitan-aw sa mga nangapil ang rota aron di makalitan.
Bisan tuod kon naandan ni nga agianan sa mga mountain biker, labina niadtong taudtaud na ani nga extreme sports, apan kahibawo kong daghan ang wa pa kataak aning ubang portion sa rota.
Alang sa tanan nga riders, good luck! Amping mga migo. Ayaw kalimot sa pag-ampo nga matiwas ang rota nga luwas. Kon di makaya, ayaw pugsa.