KLARO sa tanan nga seguridad ang tuyo niining pagpawong sa signal sa cellphone karong Sabado ug Dominggo. Apan daghan gihapon ang moreklamo nganong walay signal. Yabag, di ba?
Wa na tay mahimo nianang kawalay signal. O gusto lang gyud magreklamo-reklamo para ingnon.
Maayo na lang gani karon kay di na rason ang congestion sa mga signal nga mga mag-uyab ang mag-away. Wa nay mahitabong text message nga moabot inig labay sa usa o duha ka oras. Gani, dunay pipila nga niingon kanako nga niabot ang mga text message paghayag na sa adlaw. Haha!
Nganong di na man lang mangitag paagi nga ma-enjoy o makakontak sa usag-usa atol sa Fiesta Senyor ug sa Sinulog Festival?
Kaniadtong wala pay cellphone, daghan kaayo kitag mga paagi unsaon nga maka-coordinate aron manuroy inig Sinulog.
Hangtod karon, naa man gihapon ang mga landline. Mahimo sab nga magsabot daan asa ang tambayan diin mag-abot ang barkada o ang pamilya.
Ang pamilyang Mongaya, pananglit, anha mag-abot sa balay luyo sa Chong Hua Hospital kay malakaw lang ang Fuente Osmeña nga maagi-an sa Sinulog Grand Parade. Naa sab miy landline.
Kadtong sayo sa dekadang 80, nakahinumdom ko nga anha sa karaang Larsian mag-abot ang mga sakop sa League of Filipino Students (LFS) kay moapil sab sa Sinulog isip usa ka delegasyon.
Unsa tong tuiga nga nag-ulan sab, guys? Pwerteng basa-a ang peg ug nagka-itom ang nawong ug t-shirt.
Makahinumdom ko kang kanhi Customs collector David Odilao, nga mao ang nagsugod sa Sinulog Festival kaniadtong 1980. Kaniadtong wa pa siya mo-retire sa kagamhanan, anha magpundok ang iyang grupo sa usa ka bakanteng lote sa eskina sa Mango Avenue ug Gorordo.
Sila sab si Doris ug ang Kilusang Pagbabago Cebu naay bantang nga tungtunganan (di lang ko siguro kon bleachers o usa ka flatbed truck ba) nga ilang nasabotan nga assembly area. Naa kini dapit sa kampo sa PNP diha sa Osmeña Blvd. Nga duol kaayo sa likuanan sa Sinulog Parade padulong sa Cebu City Sports Center.
Ang importante nga klaruhon ang pagplano kon asa mag-abot ug unsay buhaton. Angay sab makahibawo kon asa ang mga payphone ug mga balay o tindahan sa mga kaila nga dunay landline.
Karong panahon na sa hightech, naa na may broadband ang mga landline. Daghan ang mga balay, opisina, ug mga establisemento labi na mga kan-anan, coffee shop, ug hotel nga dunay Internet.
Buot ipasabot mahimong mag-Facebook messenger ug manawag gamit ang Facetime.
Daghan sab ang nag-download niining app nga ginganlan og Firechat. Lahi ang teknolohiya nga gigamit niini kay mahimong maka-chat bisan walay signal.
Gitawag ang teknolohiya niini nga peer-to-peer. Buot ipasabot, moagi ang imong mga mensahe sa mga cellphone nga nag-log in sab sa Firechat.
Hinuon, importante nga daghan sa imong mga higala nga nag-Firechat sab aron mas epektibo ang imong signal.
CCLEX
Bisan pa man, makaingon kita nga dakong hagit alang sa koordinasyon kining walay signal sama sa nahitabo kagahapon diha sa among pagkontahay sa mga tawo nga nalambigit niining pagtukod sa ikatulong taytayan nga magsumpay sa Cebu City ug sa Cordova.
Ang maong taytayan gitawag sa pagkakaron nga Cebu-Cordova Link Exchange o CCLEX.
Kay gitakdang magsugod na man sa pagtukod ang maong taytayan karong tuiga, nakaingon sila nga mahimo na silang tipik sa kinabuhi sa mga Sugboanon.
Tuod man, nidesisyon silang mosalmot sa Sinulog.
Kagahapon, kuyog sila sa pipila nga taga Cordova sa Fluvial Procession dayon nibisita sa Basilica Minore del Santo Niño bisan pa man sa ulan.
Karong adlawa, gilauman nga mosalmot sila sa Sinulog Grand Parade.
Pit Senyor kanatong tanan!
(@anol_cebu sa Twitter)