WAY signal sud sa pipila ka mga oras human pagnga sa mga telecommunications company ang ilang mga cell site sugod kagahapon sa kaadlawon.
Karong adlawa, tibuok adlaw nga way signal ang mga cell phone sugod pa lang ganihang kaadlawon.
Lakang kini aron mas pahugtan ang seguridad sa Sinulog festival gikan sa mga terorista nga nagtinguhang manggubot sa Sinulog.
Usa mga paagi sa pagpabuto og bomba mao ang paggamit og cell phone isip trigger device.
Gitataw sa kapulisan nga way direktang hulga sa terorista, apan nanagana lang sila.
Apan maorag di terorismo ang hulga sa Sinulog. Ang dautang panahon maoy mas masinati sa mga Sugboanon ug mga dumoduong sa Sugbo. Dala kini sa low pressure area nga nakit-an sa eastern Visayas.
Kining mga hitaboa di angay nga mopugong sa mga deboto sa pagsaulog sa kapistahan, pagbalaan kang Sr. Santo Niño ug paglipay sa iyang tinuig nga pangilin.
Gani, sa nanglabay nga katuigan, dunay mga higayon nga giuwan ang kalihukan, apan ang katawhan wa magpadala niini.
Sa pagsugod pa lang sa siyam ka adlaw nga novena, liboan na ang nanambong sa kalihukang relihiyuso, usa ka talan-awon nga nagpakita sa kalawom sa pagtuo ug kadako sa gugma sa mga Sugboanon kang Sr. Santo Niño.
Karong adlawa, mag-uwan ug way signal sa cell phone, minilyon na usab ka katawhan ang gipaabot nga maglinya sa kadalanan nga sayawan.
Busa, ayaw pagpadala sa kahadlok o kabalaka nga mabasa sa uwan. Apil sa mga relihiyuso ug kulturanhong kasaulogan sa Iyang kapistahan.
Pit Senyor!