Basura sa Cebu City gireklamo sa Carcar

MIREKLAMO ang mga molupyo sa Barangay Poblacion 3, dakba­yan sa Carcar sa kabaho sa mga basura nga gikan sa siyudad sa Sugbo nga gihakot sa mga dump truck sa pribadong kontraktor subay sa nasudnong highway agi sa barangay road paingon sa sanitary landfill sa sili­ngang lungsod sa Aloguinsan.

Si Kapitan Wilfredo Sabala sa Barangay Pob­lacion 3 nibutyag nga nakasakop sila og walo ka mga trak nga nagkarga og mga tonelada sa basura nga gikan sa dakbayan sa Sugbo.

Ang usa sa mga drayber sa dump truck nitug-an nila nga ang mga basura ilabay sa landfill sa Aloguinsan.

Matod niya ang mga drayber nisaad nga di na moagi sa dalan sa barangay sa gabii.

Apan nasurprisa sila si Sabala dihang nilabay na usab ang mga trak sa ilang barangay kagahapon sa udto.

Ang kagamhanan sa siyudad sa Sugbo niingon nga ang Jomara Konstruct Corp. naglabayan na sa mga basura nga ilang nakolekta gikan sa dakbayan sa duha ka pribadong landfills sa Aloguinsan ug Consolacion.

Si Ronald Malacora, pangu sa General Services Office (GSO), nibutyag nga tinguha sa Jomara nga ma­doble ang ilang paningkamot pagkolekta sa mga basura hinungdan nga nikontrata kini sa duha ka pribadong landfill.

Siya nidugang nga ang Jomara naglabayan na og basura sa landfill sa Consolacion, apan kasagaran maapektuhan kini sa truck ban sa siyudad sa Mandaue.

Si John Paul Gelasque, pangu sa Department of Public Services, niklaro nga ang Jomara na ang nagbuot kon asa ilang ang mga basura. (Sun.Star Cebu)