SUSAMA og Ms. Universe ang nahitabong Sinulog Festival Queen 2017 niadtong Biyernes sa Gabii.

Kini tungod “na-Steve Harvey” o “Colombia-zoned” ang 1st runner up nga si Ivy Tanquezon Tapic sa lungsod sa Asturias human ang representante sa Barangay Labangon nga si Ceydney Go Basalo ang na-anunsiyo sa host nga si Jamie Herell.

Daling nisaka si Cebu City Tomas Osmeña ug si Sinulog Foundation Inc., Executive Director Ricky Ballesteros sa entablado aron pagklaro sa sayop sa host diin aduna’y mga ni “boo” niini.

Si Osmeña nianunsiyo nga “awarding is not accurate,” dali hinuon kini nidawat sa sayop ug nagkana­yon nga “I’m taking the responsibility.”

Sports ra usab kaayo si Basalo kinsa nihatag sa korona ngadto kang Tapic.

Matod ni Ballesteros nga wala’y tumong ang organizers nga mamahimong susama sa Ms. Universe ang ika-14 nga Festival Queen.

Gikoronahan isip Festival Queen 2017 ang lead dancer sa dakbayan sa Carcar nga si Marla Pino Alforque kinsa nakadawat og P100,000 isip cash prize.

Si Alforque usab ang ginganlan isip Ms. Epson, Ms. Island Souvenirs, Best Solo Performer ug Best in Musicality/Instrumentation ang ilahang grupo.

Tungod kay international ang mga hurado sa maong tinuig nga Sinulog Festival Queen, makalarga usab si Alforque sa Las Vegas sa Estados Unidos ug sa South Korea.

Ginganlan usab si Tapic isip Ms. Novelino, Ms. BHI, Ms. Isla 7101, Ms. FWD Life, Ms. PLDT, Ms. Uratex, Best in Festival Costume, Best Designer for Festival Costume ug Best in Production Presentation.

Makadawat siya og P50,000.

Ang representante sa dakbayan sa Talisay nga si Cristal Jane Lacida ang 2nd runner up. Makadawat siya og P30,000 ug siya usab ang ginganlan isip Ms. Air Asia ug Ms. Pocorio.