MALAMPUSONG napalitan sa ginadili nga druga ang usa ka sakop sa Road and Traffic Administration atol sa gipahigayong joint drug bust samtang nag-duty niadtong Biyernes mga alas 3:30 sa hapon sa Pelaez Boulevard, Kauswagan, dakbayan sa Cagayan de Oro.
Ang dinakpan nailang si Elzear Ysalina, 24, ulitawo, taga Zone-2, Barangay Lumbia ning dakbayan.
Sa nahipos nga impormasyon, gikabutyag nga taod-taod na nga gipanid-an ang ilegal nga kalihokan sa suspetsado ug gikasa ang operasyon human napamatud-an nga usa kini ka tigpayuhot sa ginadili nga droga.
“Taod-taod na nato na siya nga gi-surveillance mao bitaw nga nasunod gyud siya nag-conduct ta'g surveillance naa ta’y gipanggamit nga mga tao ug hangtod nga nakakuha gyud ta og sakto nga inpormante nga makapaduol sa iya,” pahayag ni Police Senior Inspector Dennis Ebsolo, hepe sa Police Station 8 sa Lumbia.
Gidugang pa nga nasikop ang suspetsado samtang nag-duty kini gani gipahubo na lamang sa kapolisan ang uniporme niini gumikan kay law-ay nga tan-awon nga ang usa sa mga sakop sa maong ahensiya ang nahilambigit sa maong ilegal nga kalihokan.
“Actually, murag law-ay kayo tan-awon nga ang usa ka miyembro sa ahensiya sa gobyerno …na involved ani…, dili pud ko gusto nga ma generalized ang tanan nga miyembro kay pipila ra man ni siguro sila ka buok nga nagbuhat sa dili sakto," dugang pahayag ni Ebsolo sa interbyu sa usa sa mga sibyaan sa radyo.
Napalitan sa usa ka pakete sa gitoohang shabu ang suspetsado ug nakuhaan pa og laing upat ka mga pakete sa gitoohang ginadili nga droga.
Gidugang pa usab nga kasagaran nga mga kustomer ni Ysalina mao ang mga driver sa pasaheroan nga jeep ilabi na diha sa Barangay Lumbia samtang sa bahin sa suspek giingong gipanghimakak niini ang maong alegasyon.
Sa pagsulat niini nga balita, ang suspetsado ang kasamtangang nagtingkagol na sa bilanggoan aron sa pagpaabot sa tukmang kaso nga ipasaka batok niini.