GI-RESCUE sa mga hingtungdan nga ahensiya ang mga menor de edad kinsa giingong tiggamitan og vulca seal ug rugby pinaagi sa gipahigayong clean-up operation labina sa Yacapin ug Osmeña Street, dakbayan sa Cagayan de Oro.

Sa 36 ka mga menor edad, upat niini mga babaye.

Sa nahipos nga impormasyon gikan sa Police Station 2 (PS2) sa Cogon, nasayran nga nagpahigayon og clean-up operation ang tinugyanan sa City Social Welfare and Development (CSWD), CEED, Roads and Traffic Administration, City Disaster Risk Reduction and Management Office, Department of Interior and Local Government, Barangay 33, Barangay 34 ug personahe sa Police Station 2 sa Cogon.

Na rescue nila ang ubay-ubay ka mga menor de edad kinsa anaa sa risgo gumikan na sa mga paggamit sa vulca seal ug rugby nga makadaot usab sa ilang mga kaugalingon.

Sa pagsulat niini nga balita, ang insidente nakatala na sa nahisgutang dapit samtang ang mga menor de edad ang kasamtangang anaa na sa buhatan sa CSWD alang sa tukmang disposasyon.

Kahinumduman nga niadtong bulan sa Disyembre tuig 2016, nagpahigayon usab og clean-up operation ang mga ahensiya sa mga menor de edad nga naa na magpuyo ilawom sa Ysalina bridge ning dakbayan.