NAPRISO karon sa selda sa Investigation Detective and Management Branch sa Davao City Police Office (IDMB-DCPO) ang usa ka 52-anyos kinsa dunay giatubang nga kasong perjury.
Ang suspek nailhang si Jovito Carillo Cutay, 52, minyo, driver, ug lumad nga taga Barangay Sanghay, Malita, Davao Occidental ug temporaryong nagpuyo sa Talosa, Barangay Talomo Proper, dakbayan sa Davao.
Subay sa journal sa kapulisan nasayran nga mikuha og police clearance ang suspek sud sa Camp Domingo E. Leonor sa San Pedro Street, dihang migula sa iyang pangalan nga naa siyay nakaung-ong nga kasong perjury didto sa korte hinungdan nga gisilbi sa IDMB ang iyang warrant of arrest.
Ang suspek dunay kasong perjury nga dunay criminal case number M-DVO-16-03665-CR nga gipagula ni acting Presiding Judge Honorable Maria Sophia Palma Gil-Torrejos sa Branch 4 sa Regional Trial Court-Davao.
Sa kasamtangan, gibalhog ang suspek samtang naghulat sa sunod mando sa korte labot sa iyang kaso.