USA KA buntis ang giguyod sa nagdagan nga motorsiklo nga gimaneho sa iyang kapuyo human sila naglalis alas 6:15 sa gabii, niadtong Huwebes, Enero 12, didto sa Air View Village, Barangay Sasa, dakbayan sa Davao.

Subay sa blotter nga natala sa Women and Children's Protection Desk sa Sasa Police Station nasayran nga giguyod sa suspek nga si Archie Baclayo Francisco, 21, ang iyang buntis nga kapuyo.

Una niini, nagpatala sa kapolisan sa Sasa Police Station ang kabanay sa biktima labot sa hitabo samtang ang biktima gitambalan ug gi-obserbahan sa mga doktor sa Southern Philippines Medical Center (SPMC) sa gisabak niini.

Mipatim-aw dayon ang suspek sa kapolisan apan positibo siyang gitudlo sa mga kabanay sa biktima ug gipapriso siya gumikan sa nahitabo.

Depensa sa suspek nga wala siya'y intensyon nga maguyod ang iyang kapuyo sa gimaneho niyang motorsiklo, nahitabo lamang dihang taliwala sa iyang panaglalis, kalit siyang mipaturatoy og padagan, diin wa niya masayri nga naghawid diay ang asawa sa motorsiklo hinungdan nga naguyod kini.

Nakahiagom og mga pangos sa kalawasan ang biktima nga anaa karon sa SPMC samtang ang suspek gikasohan na sa korte sa paglapas sa Republic Act 9262 kun Anti-Violence Against Women and their Children Act of 2004 niadtong Biyernes.