MOASDANG ning dak­bayan sa Sugbo ang mga sakop sa National bowling team alang sa Bowlingplex Tenpin Association (BTA) 18th Sinulog Open National Tournament nga sugdan karong Enero 23 sa Bowlingplex sa Gaisano Country Mall sa Banilad.

Ang pito ka mga adlaw nga kompetisyon na­kadani og 150 ka bow­lers gikan sa nagkadaiyang mga rehiyon sa nasod diin 110 niini ang mga modayo.

Nagkanayon si BTA-Cebu president Bel Suelto nga ubay-ubay sa mga sakop sa PHL national squad ug PHL RP Youth team ang mangapil sa kompetisyon.

Ang defending champion nga si Edwin Perey sa Cavite South Bowling Association (Casba) mo­depensa sa iyang korona batok sa mga pambato sa Alabang, Bacolod, Baguio, Dagupan, Dapitan, Da­vao, Iloilo, Imus, Lipa, Magallenes, Makati, Man­­daluyong, Quezon ug host Cebu.

Magsilbeng lamas sa torneyo mao ang presensya ni legendary bowler Bong Coo, four-time Tenpin Bowling champion ug maoy labing unang atleta sa Pilipinas nga nabutang sa Guiness Book of World Records.

Ang 68 anyos nga si Co usa sa mga orihinal nga sakop sa International Bowling Hall of Fame niadtong 1993 kauban si Paeng Nepomuceno.

Kombatihan sa torneyo mao ang team e­­vent, doubles event ug si­ngles/qualifying. Ang mga mopatigbabaw niini mao ang mag-ilog sa Masters’ title.

Ang kampiyon sa Master’s event makadawat og P60,000, makaangkon og P30,000 ang 2nd placer ug P15,000 sa 3rd placer.