MIAWHAG si Arsobispo Jose Palma sa katawhan nga himuon ang Santo Niño nga tinubdan sa kahiusahan.

Ang arsobispo sa Sugbo nanawagan niini sa pagtapos sa siyam ka adlaw nga nobenaryo sa kapistahan ni Señor Santo Niño pinaagi sa pontifical mass nga iyang gipangulohan sa Basilica Minore del Santo Niño kagahapon sa buntag.

Siya nakadayeg sa mga Sugboanon nga bisan kon nagtaligsik atol sa fluvial ug foot procession niadtong Sabado, daghan gihapon mga tawo ang nikuyog aron pagpasidungog sa Diyos.

“Diha sa pagtuo nga kon mouban kita kang Niño, kining Niño nga batobalani sa gugma, maoy maghatag kanato og panalangin ug bendisyon,” pamulong ni Palma atol sa iyang wali.

Siya nagtuo nga ang mga tawo nagkahiusa tungod sa Santo Niño nga maoy tinubdan sa kahiusahan.

“Kitang tanan mga anak sa Diyos, mao kini ang hinungdan ngano nga managhiusa kita, why we should unite nga dili angay nga mo-compete with each other but to appreciate one another as children of God bisan kon bata ug tiguwang, bisan professional o dili, dato o pobre,” dugang sa arsobispo.

Siya niawhag usab sa mga tawo nga taliwala sa mga hagit sa nasod, taliwa sa kaayo nga niabot ug mga problema nga giatubang sa nasod, ipakita ang ilang panaghiusa ug pagtinabangay “aron madangat ang tinuod nga communion, ang tinuod nga pag-uswag, ug ang tinuod nga kalinaw.”

Sa kasaulogan sa ika 452 nga kapistahan ni Señor Santo Niño, nagdala kini sa tema nga Santo Niño: Source of Communion, Protector of Creation.”

Matod ni Palma nga isip tinuod nga mga debotos ni Señor Santo Niño usa sa nindot nga pagpakita sa gugma sa Diyos mao ang pag-amping sa mga binuhat niini sama sa pag-undang sa dili maayong paagi sa pagpangisda, paghugawhugaw sa kanal ug palibot.

Siya nidugang nga kon gihigugma sa mga tawo ang matag usa ug ang mosunod nga henerasyon, ampingan niini ang mga binuhat sa kahistas-an.

“This is our common home. If we love the future generation, we should take care of creation, atong panalipdan kay kini pagpakita nga gidumdom nato ang umaabot nga henerasyon, yes ang kaayohan alang nato, it also meant for the good of the future generation,” sumala ni Palma.

Siya nipadayag nga nalipay siya sa tanang mga proyekto pagpananom og mga kahoy, pagpanglimpyo og mga kanal ug sa kalikopan.