COTABATO CITY -- Mialma ang pamunoan sa Autonomous Region in Muslim Mindanao (Armm) sa mga pulis sa rehiyon nga nalambigit sa illegal drugs.

Matud ni Armm Governor Mujiv Hataman nga nagkinahanglan sila og mga tarong ug hanas nga mga pulis gumikan sa hulga sa seguridad ilabina sa terorismo.

Nanghinaot si Hataman nga subling estudyuhan o kaha mabag-o pa ang desisyon sa liderato sa Philippine National Police (PNP).

Una na nga nagbahad si PNP Director General Ronald “Bato”dela Rosa nga ilabay sa Armm ang mga pulis sa Luzon ug Visayas nga nalambigit sa pagpayuhot sa gidiling droga.

Gisugyot ni Hataman nga kon dunay mga pulis nga positibo nga nalambigit sa illegal drugs, dili na sila angayan sa Armm apan kinahanglan nga sila pasakaan og kaso kon mapamatud-an nga sila sal-an taktakon sa trabaho.

Gikompirma ni hataman nga daghang pulis sa Armm ang buluyagon kung ilabay pa ang mga pulis sa Luzon ug Visayas nga nalambigit sa illegal drugs, magdugang lamang kini sa problema sa katawhan sa Armm.

Giingon sab ni PNP Armm Regional Director Reuben Theodore Sindac nga miubos sa 48 porsiyento ang kaso sa krimen sa rehiyon gumikan sa gipalig-on nga kampanya batok sa ilegal nga droga.