Dear Papa Joe,
Tawga ko sa ngalan nga George, taga Barili apan kasamtangan nga nagpuyo diri sa Cebu City, 24 anyos ug ulitawo. Di ko gwapo pero naa sad koy dating sa akong kaugalingon ngadto sa mga babaye kay kamao man sad ko modala sa akong kaugalingon. Mao nga makauyab ko og gwapa.
Naa koy uyab nga taga Bohol. Akong gibuwagan kay lagi lagyo mi bisan nakita nako nga in love siya nako. Pero di man ko ganahan nga makig relasyon og layo kay naa gyud ang tentasyon. Basin mao ray hinungdan sa among away. Mao nga quits na mi, pero ning ulahiay lang, nakaila-ila ko og babaye nga di man sab ingon ana kagwapa. Apan nahigugma man ko niya bisan pa gani nga naa na siyay anak.
Bisan gisungog pa ko sa akong mga kaila ug iya pud nga kaila nga andam ba ko modawat niya bisan naa siyay anak. Sa tinuod lang, andam kaayo ko mangamahan. Apan lahi siya, gusto niya amigo lang mi. Ako pa ganiy tighatud ug kuha niya nga mura gyud mi og uyab pero lately dihang grabe na ang sungog, molikay na siya nako ug di na gani halos managed. Mao kini ang akong suliran karon kay maglisud nako og limot niya. Palihug tambagi ko.
GEORGE
George,
Hatagan na nimo siya og time to think. Basin paspas ka ra kaayo. Basin kana siya na- trauma sa mga lalake. Gusto sab niya nga friends lang sa ug huwaton niya nga moturok lang ang gugma niya diha nimo, naturally.
Ayaw kadismaya if molikay siya nimo. Padayon lang gihapon sa imong tuyo nga pwede ra nga di ka magsige og hatod kuha niya basta ipa-feel nimo niya nga naa ka, andam mohatag sa gugma niya. Kay kon di sad ka makita niya permi kay anha sad nimo makita nga importante ka niya kay mingawon gyud na. Apan kon maorag wa ra gyud, mas maayo nga imong dawaton nga di siya para nimo ug ang mga butang para sa gugma di pwede nga ikaw ray agdon. Kana lang ug salamat.
PAPA JOE
(sa inyong tampo ipadala lang sa papajoesuperb@gmail.com)