NAA na sa plenary sa Ka­mara ang balaudnon nga Bang­samoro Basic Law (BBL). Human napasar sa ad hoc committee, ang plenary kon ang tanan nang mga Kongresista ang magbotohay kon angay ba o dili nga ipasar ang BBL.

Sa website sa kongreso, may 290 karon ka mga Kongresista nga naglakip sa nagkadaiyang grupo sa partylist. Gikinahang­lan ang 2/3 nga boto sa tanang mga Kongresista aron mapasar ang BBL sa Kamara.

Kon ang atong sumadahon ang 2/3, sa 290 ka mga Kongresista, gikinahanglan ang 193 ka mga Kongresista nga mobotar sa BBL aron mapasar kini sa ilang level ug mahimo nang ikapasa ngadto sa Senado aro botaran sa mga Senador.

Kadtong 50 ka mga Kongresista sa ad hoc committee nga miuyon sa BBL klarong nahalin na daan pabor sa mao nga balaudnon. Nagpasabot nga dunay 143 na lang ka mga Kongrista ang kuwang aron makaabot ug 2/3 alang sa pagpasar sa BBL sa Kamara.

Si Presidente Noynoy Aquino ug ang Malacañang dili na ikalimod nga mi-pressure sa mga Kongresista aron ipasar ang BBL. Gikataho nga dunay suburno nga gihatag ang Malacañang nga tag P50 milyones nga proyekto ug P1 milyon nga cash sa matag Kongresista sa ad hoc committee nga miuyon sa BBL.

Karon nga ang BBL naa na sa plenary, posibleng ang kuwarta natong mga magbubuhis mao na sab ang gihimong paon ni PNoy sa pagtingal sa mga Kongresista.

Gawas lang sa mga Kongresista nga lig-on ang prinsipyo, nahibawo ta nga daghan nila nga daling mausab ang baruganan kon masilawan sa suburno gikan sa Malacañang.

Dili na kamaong madutlan ug owaw si PNoy nga mogamit sa atong buhis sa suburno sama sa gikataho nga iyang pagtingal sa mga Kongresista sa pagpasar sa RH Law ug sa gikatahong panuburno sa mga Senador atol sa impeachment ni kanhi Chief Justice Renato Corona.

Sa isyu karon sa BBL, dunay duha ka hinagiban si PNoy sa pag-blackmail sa mga Kongresista. Mahimong iyang gamiton ang atong kuwarta sa pagsuburno aron gamiton sa mga Kongresista sa ilang kampan­ya ug lulinghayaw. Dako usab nga posibilidad nga hulgaon niya ang mga Kongresista nga dunay mga kaso nga mangapreso kon dili mobotar sa BBL.

Sa mga Kongresista nga gutom sa pork barrel, dili lisod ni PNoy ang pagtingal nila sa atong kuwarta. Sa mga Kongresista nga dunay kaso, dili sila makatugot nga mangapkap sa rehas kon mosupak sa gusto ni PNoy.

Tungod kay si PNoy ang iyang Chief Executive, dako siya ug impluwensya sa Department of Justice, sa Ombodsman ug sa Sandiganbayan. Kana ang gilimod apan dili matago nga gahom sa Presidente.

Ang pagkapasar sa BBL sa ad hoc committee nagpakita ug sinyas nga dili lisod ang pagpasar sa mao nga balaudnon sa Kamara. Ang Senado na lang ang atong paglaom kon dili sila maapil ug kahalin sa holga ug suburno.