SALAMAT LORD! Magpasalamat ta og dako sa Kahitas-an nga miduyog ang panahaon sa Sinulog niadtong Dominggo. Sa nangaging’ mga adlaw nagsige og uwan sa dakbayan sa Sugbo. Apan niadtong Dominggo kalit lang nga miiway ang mga dag-um ug migawas ang adlaw.
Gawas nga miduyog ang panahon sa adlaw sa Sinulog ug sa kapistahan ni Senyor Sto. Niño, walay gikataho nga dautan nga panghitabo. Matud pa ni Nagiel B. Bañacia, ang public information officer sa dakbayan sa Sugbo, malinawon ug hapsay ang parada sa Sinulog.
Apan gimub-an man ang rota sa Sinulog tungod sa seguridad sa mga miapil dali ra nga nahuman ang parada sa Sinulog. Usa ka maayo nga desisyon sa nagdumala niini.
Ang kasikas tungod sa pagbuto sa transformer sa koriyente sa PNP Regional office wa makaputol sa Sinulog.
Gipanghimakak usab sa AFP Central Command ang gipakatap nga bakak nga balita sa FB nga dunay miabot nga upat ka terorista.
Congratulations sa Tangub sa ilang ika-12 nga pagdaug sa Sinulog competition ingon man sa uban nga mananaog. Pit Senyor!
****
MARTIAL LAW? Niadtong Sabado, Jan 14, sa makausa pa, milanog na sad ang pung “Martial Law” gikan sa mga ngabil ni Presidente Duterte atol sa induction sa mga opisyales sa Davao City Chamber of Commerce and Industry didto sa dakbayan sa Davao.
Matud pa ni Presidente Duterte nga way makapugang kaniya kon iyang iproklamar ang Martial Law tungod sa
nagkagrabe nga problema sa ilegal nga drogas.
Dihang dapita wa gyuy molalis bisan pa ang mga justices sa Korte Suprema tungod kay nakalatid man sa atong 1987 Constitution nga ang presidente ra ang makadeklarar og martial law kon ang atong nasud sulongon, dunay kagubot ug kini gikinahanglan alang sa kaluwasan sa tanan.
Apan pung pa ni Presidente Duterte modeklarar siya og Martial Law bisan wa gisulong ang atong nasud ug way kagubot tungod ug alang sa pag-amping sa atong nasud. Ingon ani kadako ang pagmahal ni Presidente Duterte sa atong nasud ug katawhan.
Apan gisaway ni Presidente Duterte ang 1987 Constitution tungod sa limitasyon niini sa gahum sa presidente nga modeklarar og martial law. Ang 1987 Constitution natawo human nalumpag ang rehimen ni anhing Presidente Marcos.
Subay sa atong 1987 Constitution, ang presidente makaproklamar og martial law basi sa ato nang gihisgotan nga mga rason apan kutob ra 60 ka adlaw.
Unya mohatag og report ang presidente sud sa 48 oras ngadto sa Kongreso.
Ang Korte Suprema usab duna say katungod nga molili sa gibasihan sa proklamasyon sa Martial Law kon dunay mopasaka og petisyon nga mosukna nga way igo nga rason o basihan ang paproklamar niini.
Kon atong mahinumduman, niadtong Dec. 22, 2016 si Presidente Duterte mipagawas sa iyang opinyon nga maamendahan ang 1987 Constitution tungod dili sayon sa usa ka presidente nga modeklarar og Martial Law.
Ang 1987 Constitution, matud pa ni Presidente Duterte, usa ka “reckless reaction” sa nahiaguman sa katawhan niadtong panahon ni Pres. Maros.Sud sa 14 ka tuig nga ubos kita sa Martial Law diin giabusohan ang tawhanong katungod.
“Eh kung iba ang Supreme Court, magsabi ang Congress yes, no ito, or no ito, yes itong isa? Saan mo ako ilagay?
Kaya kailangan ko talagang palitan ‘yan,” pung pa ni Duterte atol sa iyang pakigpung sa community drug watch volunteers didto sa Angeles city, Pampanga.
Upat ka buwan gikan sa iyang pagsogod og lingkod nga atong presidente, si Duterte mipasabot na nga basin mapugos siya og deklarar og martial law tungod sa dako nga problema sa ilegal nga drugas.
Apan ang Presidente sa usa ka interbyo miingon nga ang Martial Law di maayo alang sa kalamboan sa nasud ug katawhan. Unsa man gyud ang tinuod? Modeklarar og martial law si Duterte o dili?
Nahimo nga diskusyon sa medya ug mga maglilindog sa prensa ang pagbalik og hisgot ni Presidente Duterte nga modeklarar siya og Martial Law. Gibasol ni Communications Sec. Martin Andanar ang, matud pa, sayop nga pagsabot sa medya sa gisulti ni Presidente Duterte.