GUMIKAN sa wa pagsanong sa iyang awhag, nameligro nga masirad-an ang usa ka hotel ug resto bar nga nahimutang sa Juana Osmeña, dakbayan sa Sugbo.

Si Mayor Tomas Osmeña nihangyo ngadto sa mga business establishment nga di sirad-an ang ilang parking area ug dili gamiton ang espasyo alang sa ilang negusyo.

Sa post sa mayor sa iyang Facebook page nga Tommy Osmeña, iyang gibutyag nga illegal nga gisirado sa Century Plaza hotel ang ilang parking area human iya kining gipahimangnoan nga di sirhan.

Inay mga sakyanan ang moparada, giukopahan kini sa daghan nga mga tawo pagkagabii, human sa Sinulog grand parade.

Gipasabot sa mayor nga ang maong lugar grabe ang problema sa trapik panahon ug human sa Sinulog grand parade sanglit kini maoy sentro sa lingawlingaw.

“The management of Century Plaza is going to have to explain why they shouldn’t have their building permit cancelled for violating the (National) Building Code,” matod ni Osmeña.

Gisuwayan og tawag sa Superbalita Cebu ang management sa Century Plaza Hotel apan nibutyag nga di pa sila makatubag karon sa show cause order sa mayor sanglit wala pa ang ilang representante.

Gitug-an sa mayor nga nisunod sa iyang awhag ang management sa One Mango ug Mango Square apan wa mosunod ang maong hotel.

Samtang kon walay kausaban, i-revoke ni Osmeña ang business permit sa Backflip Resto ug laing duha nga wa nganli sa mayor gumikan sa pag-violate sa ilang patigayon.

Si Osmeña mismo maoy nangunay sa pagpawong sa ilang disco sound system sanglit ang mga tawo di na ma-control ug nakahatag og hulga sa kinabuhi sa uban nga molabay.

Ang wala magustohi sa mayor mao ang pagbalik og patukar sa management human siya nibiya.

“Backflip Resto, the bar that thought it would be cute to turn the music back up after I left, is also going to lose its business permit tomorrow. I hope the extra revenue was worth it!,” dugang ni Osmeña.

Si Osmeña nangunay sa paglibot sa mga dapit sa dakbayan sa Sugbo diin kanunay magtapok ang mgatawo tungod sa mga party.

Siya ang nimando sa pagpasayo og human sa grand parade tungod sa kanunay nang suliran sa trapiko.

Pipila ka mga adlaw ang nakalabay, nibahad na si Osmeña nga iyang silutan ang di mosunod sa gusto sa Siyudad, sama sa di pagpahigayon og party mga 300 metros gikan sa parade route ug di gamitong diskohan ang mga parking area.

Kini aron malikayan ang mga kagubot.