MIABOT og 112.14 mil­yones ka baril sa tubig ang gibubo sa dakbayan sa Sug­bo sa nasinati nga pagbu­nok sa uwan sugod alas 3:16 kagahapon sa kaadlawon.

Si Engr. Oscar Tabada, pangu sa Philippine Atmospheric, Geophysical and Astronomical Services Administration (Pagasa) Visayas, niingon sa dyAB nga tungod sa tail-end of a cold front ug low pressure area ang hinungdan sa kusog nga uwan kagahapon.

Ang tail-end of a cold front mao ang panagtagbo sa hanging amihan kun bugnaw nga hangin ug easterlies kun hangin nga gikan sa kadagatan duol sa equator.

Ang resulta sa mao nga panagtagbo mao ang kusog nga uwan.

Si Romeo Aguirre, weather specialist sa Pagasa Visayas, nipahibawo nga niabot og 71.2 millimeters ang gidaghanon sa tubig nga dala sa pagbunok sa uwan sugod alas 3:16 sa kaadlawon hangtod alas 7 kagabii, base sa ilang pagsukod.

Subra kini sa katunga sa normal nga gidaghanon sa uwan alang sa Enero nga 126.4 mm.

Matag millimeter, equi­valent sa 5,000 ka baril ma­tag oras sud sa usa ka kilometro kwadrado nga luna.

Ang labing kusog nga uwan nasinati gikan alas 5:30 sa buntag hangtod alas 7 sa buntag kagahapon.

Aron makuha ang sukod sa gidaghanon sa tubig, ang 71.2 mm gi-multiply og 5,000 ka baril ug gi-multiply usab sa gidak-on sa yuta sa siyudad sa Sugbo nga moabot og 315 kilometro kwadrado.

Ang resulta, moabot og 112,140,000 ka mga baril sa tubig uwan ang nabubo sa dakbayan sa Sugbo.

Ang LPA katapusang nasigpatan sa Zamboanga, Sibugay alas 5 kagahapon sa hapon.