PAHIMANGNO karon sa kapolisan sa Gingoog Police Station nga hinay-hinayan ang pagka-adik sa social media tungod kay migawas sa imbestigasyon nga kini ang hinungdan nga na-missing ang pipila ka mga batan-on sa sa dakbayan sa Gingoog.

Ang pabiling missing ning panahona giilang si Juliet Salazar, 18, taga Barangay 25, ug Patricia (apelyido gitago) taga Barangay Kandiis, dakbayan sa Magsaysay.

Nasuta nga usa sa mga na missing ang nakasohan na ang uyab gumikan kay kini maoy kauban sa biktima dihang nagsugod og kawala apan hangtod sa pagkakaron wala pa nakabalik sa ilang puloy-anan.

Si Police Inspector Marilyn Pimentel, hepe sa Women and Children Protection Desk sa Gingoog City Police Station, nibutyag sa SunStar SuperBalita nga kini ang ilang giimbestigahan ning panahona gumikan kay nasuta nga duha sa mga missing ning panahona ang pulos miyembro sa Memory Text Lovers Clan.

Gipasabot niini nga kini nga grupo ang adunay babaye ug lalaki nga mga miyembro nga mag-ilahay dinha sa group chat o group text ug sagad dinhi makakita og ma-uyab.

Adunay group chat diha sa Facebook ug aduna sab group text pinaagi gihapon sa text lamang. Nasuta usab nga adunay presidente sa ilang grupo.

Giingong dili na gapaminaw sa ilang ginikanan tungod kay nabuang na sa ilang grupo ug dinhi sab sa grupo nakauyab.

Gipasabot ni Pimentel nga unta ang mga batan-on sa dakbayan dili magpataranta niini tungod kay dili kini mayo nga ehemplo.

Curfew

Gibutyag sab ni Pimentel nga sukad gipatuman ang curfew sa dakbayan sa Gingoog miubos ang kriminalidad nga kalambigitan sa batan-on.

Gani aduna silay gaka-rescue uban ang City Social Welfare and Development nga moabot sa 10 ngadto 15 ka batan-on matag gabii.

Aduna sab higayon nga ang mga kabatan-onan polis lamang ang gabantayan hinungdan aduna silay laing mga pamaagi nga dili mabantayan ilang presensya diha sa pagpangdakop matag gabii.