USA ka lalaki ang napusilan ang sampot samtang nag-ampo sulod sa simbahan niadtong Dominggo, Enero 15, alas 11:30 sa gabii sa simbahan.

Gisuta pa sa kapolisan sa Police Station 1 sa Divisoria ang tinuod nga panghitabo.

Nilanding sa Northern Mindanao Medical Center sa Cagayan de Oro ang biktima nga nailang si Edgardo (bansagon gitago) nga taga Carmen ning dakbayan human nakaangkon og samad sa iyang wala nga bahin sa sampot.

Sa pakighinabi sa SunStar SuperBalita ngadto sa kaipon sa biktima giingong adunay sakit nga epilepsy ang iyang kaipon ug kung maglain na ang bati-on niini mosulod kini sa simbahan aron nga mag-ampo.

“Naa man gud na siya’y sakit, epilepsy ba, kung tukaran siya mosulod na siya og simbahan diha sa Cathedral mag-ampo, masuko man gud na siya pud og badlungon, gipusil gyud siguro kay sa lubot man naigo kung salba sa ibabaw ra unta,” ang pahayag sa kaipon niini.

Gibutyag usab sa nakakita sa maong panghitabo nga giingong nag-ampo lang ang biktima diha sa entrada sa maong simbahan apan giduolan kini og hubog hinungdan nga nidagan kay nahadlok ug nagkuha og bunal.

Giingong gigukod pa sa biktima ang maong hubog apan nakapalayo na kini ug didto nagwara-wara sa dalang bunal ang maong biktima hinungdan nga gibadlong sa guwardya apan nasuko kini hinungdan nga gipasalbahan sa guwardiya.

Sa pagkakaron, kasamtangan pa nga giimbestigahan sa kapolisan ang maong panghitabo aron nga masuta ang tinuod nga hitabo kung nganong nakaangkon og samad pinusilan ang biktima nga sa taas lang matod pa nga bahin nagpabuto ang maong wala pa hinganli nga guwardya.