USA ka konsiyerto ang gilusad sa Davao Museum of History and Ethnography kaabag ang Marco Polo Davao sa tumong nga makatigum og pundo alang sa nagkadaiyang programa ug exhibits subay sa ika-40 ka tuig sa Davao Museum.
Ang benefit concert nga “Sonata, An Evening of Classical Music and Filipino Art Songs” mag-feature sa soprano nga si Stefanie Quintin ug classical guitarist nga si Anton Luis Avila.
Anaa sab ang ispesyal nga partisipasyon sa pianist nga si Martina Audrey Uyboco.
Himuon ang konsiyerto karong Enero 23, 2017, alas 6 sa gabii sa Marco Polo Ballroom.
Suma pa nga ang Manila-based duo nga sila Stefanie ug Anton mopadungog sa ilang mix of classical and contemporary music.
Pipila sa mga awit nga giandam aron moharana sa mosaksi mao ang Renaissance, Baroque, Classical ug Romantic Periods.
Samtang ang Davao-based pianist nga si Martina moduyog sab sa pipila ka classical music.
Sa mga buot mosinati ug ma-hele sa mga classical music, ang tiket mapalit sa balor nga P1,000 (VIP), P500 (General Admisssion) ug P150 alang sa mga estudyante.
Mamahimo sab nga mopalit og ticket sa Davao Museum sa Agusan Circle, Insular Village Phase 1, Lanang, dakbayan sa Davao.
Ang Davao Museum of History and Ethnography gibuksan niadtong 1977 sa gidonar nga luna sa Insular Village, Lanang ning dakbayan.
Miaginod ang operasyon sa Davao Museum pinaagi sa suporta sa mga patrons, private ug corporate sponsors, media, akademya ug uban pa.
Ang museyo anaa sa pagdumala sa Davao Museum Foundation, Inc.
Sa pikas bahin, nahimo sab nga posible ang konsiyerto inabagan sa Marco Polo Davao, Ap Securities Inc., Dusit Thani, Maria Stella Celi, Damosa Land, Anflocor, Sun Made Brown Rice, One Network Bank, Atty and Mrs. Joseph Tan, R.A Hao Group, Mary Ann Al-Sheri, Agnes Locsin ug Locsin Dance Workshop. (Uban ang PR)