GIDUGOK og daghang mga deboto ang Shrine of the Holy Infant Jesus of Prague dinhi sa Matina, Davao City atol sa kapistahan ni Señor Sto. Niño niadtong Dominggo, Enero 15.
Mga deboto nagagikan, di lang dinhi sa dakbayan, apan sa mga kasikbit sab nga mga kaprobinsiyahan ug uban pang lugar sa Mindanao.
Nanglikod na lang intawon ang ubang mga deboto sa ground sa Shrine gumikan kay halos wala nay kalingkuran tungod sa kabaga sa katawhan nga miduyog sa kasaulogan.
Bisan mga sakyanan naghuot sab ug halos wala nay kaparkingan sa Shrine tungod sa kadaghan niini.
Pagsaka pa lang padulong sa Shrine, naglinya na ang mga sakyanan ug halos di na moirog tungod kay sa ibabaw nga bahin, puno na sab sa mga behikulo, gawas pa sa ubang mga sakyanan nga naaberiya sa dalan.
Hinungdan kini nga nagpanon na lang og baktas ang mga tawo padulong sa Shrine aron lang nga makaapil sa Santos nga Misa ug makahalad og pag-ampo ngadto sa Batang Hesus nga si Sto. Niño.
Daghan sab nga mga tawo nga nagbitbit og mga imahe ni Senior Sto. Niño aron nga pabenditahan ug gisayaw-sayaw ug naninggit sa ngalan sa Batang Hesus.
Ingon niini kadako ang pagtuo sa mga deboto ngadto kang Sto. Niño nga giingong gimilagrohan kay nadawat nila ang ilang mga gipangayo samtang ang uban giayo sab sa ilang mga sakit.
Ang pinakanindot sab sa kasaulogan, taliwa sa daghang mga tawo ug naghuot nga mga sakyanan, nagmalampuson kini ug mga dautan nga nahitabo.
Pasalamatan nato ang mga kapulisan, kasundalohan, mga personahe sa City Transport and Traffic Management Office ug uban pang mga tawo nga miabag aron nga mahapsay ug mabantayan ang kapistahan ni Sto. Niño.
Pasalamatan sab nato ang mga deboto nga wala pod magpasagad sa ilang mga kaugalingon ug misunod sa mga gilatid nga sumbanan aron nga hapsay ang ilang pagsaulog sa kapistahan.
Ug labaw sa tanan, salamat ngadto sa atong Labaw nga Makakagahum.