USA ka giilang “maoy” kon mahubog sa ilang lugar ang nakapatay og duha ka iro mao nga gibalhog karon siya sa selda sa Talomo Police Station.
Alas 8:10 sa gabii, Dominggo, Enero 15, gisikop sa kapulisan si Geraldo Cenabre, 21, residente sa Barangay Dumoy, Talomo District, dakbayan sa Davao, human gireklamo sa iyang duha ka silingan nga tag-iya sa duha ka iro nga iyang napatay.
Subay sa blotter nga natala sa Talomo Police Station, nasayran nga nag-ekis-ekis ang linakwan sa suspetsado nga pauli sa ilang balay kinsa lango sa ilimnong makahubog.
Dugang nasayran nga wala siya gitagad sa iyang mga silingan ug dihang iyang nasugatan ang iro nga gipanag-iyahan ni Argie Ablan Codilla maoy iyang gipahimungtan, gidunggab ug napatay.
Wala pa kini matagbaw, nakasugat na sab siya sa iro nga gipanag-iyahan ni Abrelyn Gilbero ug iya na sab kining gidunggab hangtud namatay ang iro.
Dungan nga nangreklamo sa buhatan sa kapulisan ang duha ka tag-iya sa iro hinungdan nga gisikop ang suspek.
Kasong pagsupak sa Republic Act 8485 kun Animal Welfare Act of 1998 ang ipasaka sa suspek sa korte.