MAAYONG seryusuhon sa mga magtutudlo o administrador sa mga tunghaan sa pagpangandam ug leksyon bahin sa emerhensya labi na dinhi sa dakbayan nga dunay taas nga edipisyo sa mga eskuwelahang publiko.
Sama sa kaulohan, ang mga tunghaan nga gitumbok nga risgo sa paglihok sa Marikina fault nihimo og ehersisyo kon unsa buhaton kon moigo ang kusog nga linog. Dili usab layo nga mahitabo og balik ang dili magsaba o walay pasiunang timailhan nga linog susama sa nahitabo niadtong tuig 2013, maayo na lang nga naatol kadto sa holiday o walay klase.
Dili lang leksyon bahin sa linog, apan sa tanang matang sa emerhensya. Pananglitan, duna bay igong exits o escape routes, fire extinguishers ug mga ekipo sa pagbatok sa sunog? Kanus-a pa kita mangandam, unya human na lang sa laing katalagman? May kinabuhi nang nakalas ug mga kabtangan nahanaw? Sakit ug paet nga kasinatian. Maayong malikayan nato kini pinaagi sa tukma nga pagpangandam human wala kitay igong gahom sa pagsanta sa hingpit sa puwersa sa kinaiyahan.
Samtang maayong masabtan sa mga enosenteng kabataan nga mao kini ang kamatuoran sa kinabuhi aron pag-andam sa ilang sikolokal nga bahin, dili lang pisikal, aron dili maglibog ug takos sa ilang kaugalingon sa pagharong sa bisan unsa hagit nga moabot ning dili nato matagna nga panahon.
Sa kinatibuk-an, ang edukado ug lungsoranong nasayod dili mailad ug puno sa pagpakabana labi na sa kabataan nga ling-ong pundasyon alang sa kaugmaon sa nasod.