ORMOC CITY - Gitugyan na sa Department of Social Welfare and Development (DSWD) 8 ang P689.3 milyones nga tseke alang sa Emergency Shelter Assistance (ESA) ning dakbayan.

Gitunol ni DSWD 8 Director Nestor Ramos ang tseke ngadto ni Mayor Edward Codilla sud mismo sa opisina sa mayor niadtong unang adlaw.

Si City Administrator Francis Pepito niingon nga target nilang ipanghatag sa liboan ka be­nipis­yaryo ang ESA karong buwana gumikan kay ilang ihan-ay ug i-double check ang tanang dokumento.

Ang mga biktima sa bagyong Yolanda nga hingpit nagub-an og kabalayan o totally damaged, makadawat og pasiunang P15,000 kapin nga ESA samtang P10,000 ang wa kaayo ma gub-i.

Base sa guidelines, P30, 000 unta ang totally damaged apan P15, 000 nalang aron mahatagan ang tanan.

Kahinumdoman nga nisobra ang ihap sa mga benipisyaryo kon itandi sa pundo nga giaprobahan sa Kongreso. Anaa sa 52, 000 kapin ang anaa sa lista apan P689.3 milyones ang naaprobahan.

Tungod kay kuwang ang ma­dawat sa totally damaged, hatagan lang sila og mga sin.

Kapin 400,000 ka pligo nga sin ang ihatag sa DSWD sa Ormoc, niingon ang kagamhanan nga 15 ka pligo nga sin ang ihatag sa matag totally damaged apan niingon si Ramos nga kuwangon ang ilang gihatag nga sin sa dakbayan.

Anaa sa 102,000 kapin pa lang ang sin nga niabot sa dakbayan ug may kuhaonon pa sa Tacloban.

Mohimo og dry run ang kagamhanan sa pagpanghatag sa ESA ug posibli ipahigayon kini sa Superdome.

Mopasar og resulosyon si City Councilor Vince Rama aron hatagan og ‘special privilege’ ang mga Senior Citizen, Persons with disabilities ug mga mabdos atol sa hinatagay.