UNSAY kabag-ohan nga gitanyag sa Sugbo sa pagdani sa mga turista? Naunsa nga negatibo ang gipakita sa naulahing Sinulog Festival niadtong Dominggo ug ning pagpahigayon sa Sugbo sa swimsuit competition sa Miss Universe 2017.
Ang pagputol sa signal sa mobile phone sa tanang telephone companies atol sa maong mga kalihokan subay sa mando sa kagamhanan dili maayo alang sa turismo ug pamatigayon. Momugna kini og tumang kabalaka.
Apan unsa kaha katinuod ang hulga sa terorismo nga rason sa paghimo sa maong lakang sa awtoridad? Hinuon, sumala sa awtoridad, bahala na kon nanubra ang ilang reaksiyon sa seguridad kaysa magbasol sa kaulahian.
Dakong tumong ning pagpahigayon sa 2017 Miss Universe pageant sa Pilipinas mao ang pagpalambo sa turismo sa nasod apan kon ingon niini ang matang sa kahigpit sa seguridad, dili kaha negatibo ang epekto sa atong turismo?
Samtang, napaklaro hinuon ang walay tino o dili kasaligan ang mga tignaniid sa awtoridad busa nisagop sa mas sayon nga paagi sa pagputol sa signal sa cellphones. Nasayod ka ba nga dunay signal o wala, ang mga terorista moataki gyud human daghang gerilyang pamaagi sa pagsagwag og kagubot.
Ug nahisama sa nawalay-bili ang tumong sa pagpahigayon sa dakong kalihokan nga gigahinan og dakong pundo ug panahon tungod lang sa walay tino nga pamaagi sa seguridad.
Dugang pa, negatibo usab sa turismo ang grabeng trapiko sa Metro Cebu ug ang baha nunot sa pagbunok sa uwan tungod sa kakuwang drainage system laing lama sa turismo sa Sugbo.