NAGHINAMHINAM na karon ang Philippine national women’s volleyball team alang sa pagbalik niini sa Southeast Asian Games 2015 sa Singapore human sa 10 ka mga tuig nga wala kini maapil sa maong kompetisyon.
Ang team, nga pangulohan sa volleyball stars nga sila si Rachel Anne Daquis ug Alyssa Valdez, nagtinguha nga ilang matupngan ang bronze medal nga ilang naangkon niadtong 2005 SEA Games.
Tungod sa kasikat sa volleyball karon sa nasod, malaumon ang volleyball fans sa kampanya sa team.
Masaligon sab si Daquis nga makahatag sila og dungog sa Pilipinas.
“Nandun naman ‘yung pressure sa games pero I’m confident dahil alam kong magtutulong-tulong kami,” matod ni Daquis sa interbyu sa News5.
Ang national team coach nga si Roger Gorayeb nitug-an nga ang iyang team moduwa isip underdog batok sa ubang teams nga aduna’y mas daghang kasinatian.
“On the positive side ‘yung mga bata is passionate naman e. Everybody is so excited to go to the SEA Games dahil 10 years e,” matod ni Gorayeb.
Ang ubang mga sakop sa team mao sila si Gretchel Soltones, Rhea Dimaculangan, Jovelyn Gonzaga, Dennise Lazaro, Dindin Manabat, Jaja Santiago, Aby Maraño, Jia Morado, Maika Ortiz, Aiza Maizo-Pontillas ug Bea De Leon.