BANGIS nga panimalos ang gihimo sa defending champions San Miguel Beermen ngadto sa Brgy. Ginebra Gin Kings, 134-109, sa miaging gabii sa Game 2 nga maoy nagtabla sa best-of-seven championship series, 1-1, sa Philippine Basketball Association (PBA) Commissioner’s Cup sa Araneta Coliseum.
Ang Beermen, nga gipanghubog og maayo sa Gin Kings, 99-127, sa Game 1 niadtong Biyernes, nagmangtas dayon sa pagsugod pa lang sa Game 2 ug wala kini molugak hangtod na sa katapusang gutlo.
“We were so sad with what happened in the last game,” matod ni Austria human sa Game 2.
“We were humiliated. But this time, we’re able to get back and even the series. Now, we have a series.”
Kon dili tanan, kadaghanan sa mga magduduwa sa Beermen madasigong ningkombati apan wala’y makatupong sa gipakita ni Alex Cabagnot, kinsa mirehistro og career-high nga 33 puntos ug siyam ka assists aron pangulohan ang kadaugan.
Adunay laing lima ka mga magduduwa ang Beermen nga ning-amot og dobleng numero nga puntos.
Ang Sugbuanong higante nga si JuneMar Fajardo nitampo og 25 puntos, ninghatag og 20 puntos matag usa sila si import Renaldo Balkman, Marcio Lassiter, ug Christian Standhardinger samtang nitunol og 14 puntos si Arwind Santos.
Nanginit dayon ang mga kamot ni Cabagnot sa pagsugod pa lang aron hatagan ang Beermen og 34-23 nga labaw human sa 1st quarter. Ning puntoha, aduna na siya’y 10 puntos si Cabagnot.
Nagpadayon ang pagbulhot sa opensa sa Beermen ug ilang nainat ang ilang labaw ngadto sa 75-46 sa halftime.
“Kung obsessed ang kalaban noong Game 1, si Alex kanina, obsessed din,” dugang ni Austria.
Gawas nga wala nila kapugngi si Cabagnot, ang Gin Kings nakamugna sab og daghang turnovers sa 1st half nga gipahimuslan og insakto sa Beermen.
Sa pagpangulo sa ilang import nga si Justine Brownlee, ang Gin Kings ming-aksyon paggukod sa 3rd quarter uig ilang napahakan og gamay ang labaw sa Beermen.
Apan wala motugot ang Beermen nga makahunat ang Gin Kings sa paggukod ug ilaha kining gipakgang pinaagi sa pagpasutoy og balik sa ilang opensa.
“They came out and played tough, played very hard and tonight, showed why they’re winning a lot of championships in the past,” matod ni Brownlee, kinsa maoy nangulo sa Gin Kings pinaagi sa iyang 29 puntos.
Alang kang Brownlee, ang dako nilang kapildihan nagsilbe nilang leksyon ug kinahanglan nilang makabawi sa Game 3 nga ipahigayon ugma.
“We just made a lot of mistakes, especially early on turning the ball over. Of course, when you turn the ball over, you try to get it back. I think that’s where some of the fouls came,” dugang ni Bronwlee, kinsa maoy nag-una sa inilugay sa Best Import award.
Puntos matag usa
San Miguel (134)- Cabagnot 33, Fajardo 25, Lassiter 20, Balkman 20, Standhardinger 20, Santos 14, Mamaril 2
Ginebra (109)- Brownlee 29, Devance 16, Thompson 16, Slaughter 15, Tenorio 13, Mercado 11, Chan 4, R. Aguilar 2, Manuel 2, J. Aguilar 1. ESL