NAGKUMBOYA og 67 puntos lakip na niini ang 13 ka three-point shots ang pambatong trayanggulo sa host Golden State Warriors samtang nitampo og triple-double si Draymond Green aron ipanglampornas ang defending champion Cleveland Cavaliers, 126-91, kagahapon sa National Basketball Association (NBA).

Gipangulohan ni Klay Thompson ang bangis nga kadaugan pinaagi sa iyang 26 puntos lakip na niini ang lima ka three-point shots.

Si Kevin Durant nitampo og 21 puntos lakip niini ang tulo ka tres unya nihatag og 20 puntos si Stephen Curry lakip niini ang lima ka tres alang sa kadaugan.

Samtang si Green nitunol og 11 puntos, 13 rebounds ug 11 assists alang sa Warriors. Natupngan sab ni Green ang iyang career best nga lima ka blockshots.

Ang Warriors ming-abante sa 35-6 nga rekord.

Nagsilbe kining bangis nga panimalos sa Warriors ngadto sa Cavaliers nga nagpukan kanila sa finals series, 4-3, sa miaging season ug sa kombati niadtong adlaw sa Pasko, 109-108.

Ang Cavaliers adunay lima ka mga magduduwa nga ningmugna og double-digit nga puntos pina­ngulohan sa 20 ni four-time MVP LeBron James apan wala sila nakasugakod sa kamangtas nga gipakitang duwa sa Warriors.

Nidugang og 17 puntos si Kyrie Irving alang sa Cavaliers, nihatag og 15 puntos si Iman Shumpert samtang niamot og 11 puntos matag usa sila si Kyle Korver ug Richard Jefferson.

Ang Cavaliers nangahagbong sa 29-11 nga baraha.

Nagkagidlay ang opensa sa Cavaliers ug igo lang kining ming­poste og 31-of-88 sa fieldgoals.

Ning duwaa, nagkabangi na sab sila si Green ug James sa nahabiling 6:55 minutos sa 1st half. Niining higayuna, naglabaw na ang Warriors og dako, 52-35.

Natumba si James dihang gide­­pensaan siya’g hugot ni Green, kinsa natawagan og flagrant foul 1 niadtong mga gutloa.

Padayon nga nagsaka ang labaw sa Warriors hangtod nga nakasabot na ang Cavaliers sa ilang kapildihan bisan wala pa nahuman ang gikaintapang nga panag-engkuwentro. ESL/AP