WA na hinuon makapauli sa ilang lugar sa Mindanao ang lalakeng nianhi dinhi sa Sugbo kauban sa iyang mga higala aron pagtambong sa kapistahan ni Sr. Santo Niño.
Sa bilanggoan na nahipunta si Joel Guillana, 25, taga dan Magsaysay, Cebu City human gidakop sulod sa Cebu South Bus Terminal tungod sa “bomb joke.”
Sa dihang susihon na unta ang sulod sa iyang bag, siya gikataho nga nisulti sa usa sa mga kawani sa terminal nga may dala siya nga lima ka kilong bomba.
Tungod niini, diretsong gidakop si Guillena sa mga guwardiya.
Sa pasiuna nga imbestigasyon sa kapulisan, si Guillena kauban sa lain pang mga batan-on, ningsulod sa entrance 2.
Padung silang mosakay og bus pauli sa ilang lugar sa Mindano.
Unang nakasulod ang iyang mga kauban ug sa iya na unta nga turno, nipahibawo siya nga siya may dala nga bomba.
Wa damha ni Guillena nga masikop ug mabilanggo siya sa iyang gihimong komedya.
“Joker jud ko sa amoa, Sir. Joke joke ra to. Sa kaming mga barkada, akoy joker nila,” matod ni Guillena sa Superbalita Cebu.
Si Guillena gitugyan sa Carbon Police aron adto bilangguon samtang pasakaan og kaso nga kalapasan sa Presidential Decree 1727 nga nagdili sa pagpangomedya kalabot sa bomba.
Sa milabayng semana naabot sa Sugbo si Guillena uban sa iyang mga barkada arun mamista sa Señor Santo Niño kauban ang iyang mga silingan.
Ang iyang mga kauban nga wa usab makasakay kay wa makapalista og sayo alang sa biyahe, niunong na lang usab kaniya.