SAMA sa nahitabo niadtong Sabado ug Dominggo atol sa Sinulog 2017, dunay mga dapit sa Metro Cebu ang napagngan sa cellular phone signal.
Nasukwahi sa pahibawo sa Police Regional Office (PRO) 7 nga ang dakbayan sa Lapu-Lapu ray mapagngan og signal, mga netizen sa Metro Cebu ningpahibawo sa pagkawala sa signal gikan sa lungsod sa Liloan hangtod na sa Talisay City.
Si Smart Communications Visayas-Mindanao head Manlalaban Maria Jane Paredes, nipahibawo sa Superbalita Cebu nga di lang kay ang pipila ka dapit ra sa Metro Cebu ang naapektuhan, duna say sa isla sa Camotes ug Bohol.
Matod ni Paredes nga bisan gawas na sa Lapu-Lapu City ang mga cell sites, tungod sa kaduol niini sa isla sa Mactan, kalagmitan duna gihapoy makuha nga signal.
Lakip na niini ang tag-as nga mga dapit dinhi sa Sugbo diin nahimutang ang ilang cell sites.
Igo ra usab silang nagtuman sa mando sa National Telecommunications Commission (NTC) nga pagngon ang mga cell site alang sa seguridad sa mga kandidata sa Miss Universe.
Tungod sa pagpawong sa cell sites, ang kapulisan gisaway sa mga netizen.
Ilang gipawong ang ilang cell sites gikan sa alas alas 4 ngadto sa alas 10 sa buntag ug ala 1 sa hapon hangtod sa alas 8 kagabii.
Mamawong usab sila gikan sa alas alas 5 ngadto sa alas 8 karong buntag.