BISAN pa sa hulga sa dautang panahon, hapsay ug malinawon ang pagpahigayon sa swimwear presentation sa mga kandidata sa Miss Universe human gibalhin ang pasundayag sa Triton Hall sud didto sa JPark Island Resort and Waterpark kagahapong adlawa.

Kini maoy gibutyag sa hepe sa Lapu-Lapu City Police Office (LLCPO) PSSupt. Rommel Cabag­not sa dihang nahinabi sa Superbalita Cebu kagahapon.

Apan nagkaproblema ang kapulisan sa dakba­yan kagahapon sa buntag human nawagtang ang ilang komunikasyon sa radyo sa dihang nawala ang signal sa repeater.

“Nawala (ang signal) atong repeater so nawala atong radio kaganinang kadlawon. Mga 7 oclock (sa buntag) siguro usa pa nakabalik so initially nawad-an mi ug communication,” ni Cabagnot ning mantalaan.

Dugang ni Cabagnot nga maayo na lang kay napakatap na ang kapulisan sukad alas 4 sa buntag mao nga ang gibuhat sa iyang buhatan, mano-mano ang pagpahibawo sa sitwasyon saw a pa nibalik ang komunikasyon.

Gitataw ni Cabagnot nga ilang duda nga brown out ang dapit diin nahimutang ang ilang repeater o di ba kaha apektado sa dautang panahon hinungdan nga nawala ang signal niini.

Paambit ni Cabagnot nga way mga dagkong problema nga nasugatan ang kapulisan sa pagbantay sa seguridad sa maong kalihukan gawas lang sa grabeng dagsa sa mga tawo nga modutdut makakita lang sa mga kandidta sa Miss Universe.

“So far no major problems ang nasugatan nato except sa mga crowd nga di na mapugngan tu­ngod sa ka excited pud nga makakita sa mga kandidata. Mismong mga empleyado, gusto pud maka-selfie,” ni Ca­bagnot.

Matod ni Cabagnot nga moabot ngadto sa 1,008 ka mga pulis, sakop sa Navy, Maritime police ug coast guard ang kinatibuk-ang gipadeploy sa aginaan sa kandidata paingon sa venue sa swimwear presentation aron mobantay sa seguridad sa kalihukan. May counter sniper sab gikan sa PNP-Special Action Force nga gipakatap.

Langay

Nalangay usab ang pag-abot sa 67 ka mga kandidata nga niapil sa swimwear presentation kagahapon.

Unang gikataho nga moabot ang mga kandidata gikan sa kaulohan alas 6 sa buntag apan nakatugpa ang ilang gisakyang commercial nga eroplano mga alas 6:50 sa buntag.

Pasado alas 10 sa buntag na usab nakaabot si Miss Universe 2015 Pia Wurtzbach sa JPark sukwahi sa gikataho nga moabot kini alas 8 sa buntag.

Kauban ni Wurtzbach sa iyang pag-abot si kanhi Ilocos governor Chavit Singson.

Nasugdan na ang kalihukan pasado alas 12 sa udto imbes alas 11 sa buntag sumala sa gikatakdang schedule.

Atol sa swimwear presentation, crowd favourite sila si Miss Philippines, Miss Colombia, Miss Mexico nga parehong nakadawat ug masipang pakpak gikan sa mananan-aw.

Lakip sa kusog nga gipakpakan sa mga nitan-aw mao ang katapusang nipaso nga si Miss Vietnam nga diriyot natakilpo tungatunga sa stage apan grace under pressure gihapon kini sa presentasyon.

Pipila sa mga politiko nga nitunga sa maong presentasyon mao sila si Bise Governador Agnes Magpale, Lapu-Lapu City Mayor Paz Radaza, Mandaue City Mayor Luigi Quisumbing, Cebu City Mayor Tommy Osmeña, Chavit Singson, Department of Tourism Secretary Wanda Teo.

Sa main pool ug sa Avalone Garden unta ipahigayon ang maong swimwear presentation apan wa gidayon tungod sa bati nga panahon.

Sukad sa miaging semana, ang Sugbo ug ubang mga dapit sa Mindanao nakasinati og bati nga panahon tungod sa low pressure area (LPA) ug hangin nga amihan.