LISOD apan nagtuo gihapon si Japeth Aguilar nga makakuha og luna si Bobby Ray Parks sa National Basketball Association (NBA) basta maningkamot lang kini sa iyang mga duwa.

Ang 6-foot-9 forward sa Barangay Ginebra nagkanayon nga adunay igong abilidad si Parks nga magsilbe niyang puhonan aron makasulod sa NBA hilabi na kon mopaubos kini og training sa Amerika.

“He (Parks) has all-around game. He’s a very decent player and he’s just what a coach wants because pretty much, he’s an all-around player,” matod ni Aguilar sa pagpakighinabi sa Spin.ph.

Si Parks, kanhi two-time UAAP MVP, nagplano nga moapil sa rookie draft sa NBA karong Hunyo 25.

Si Aguilar maka-relate sa pangandoy ni Parks gumikan kay iya sab kining gitinguha tulo na ka mga tuig ang nakalabay.

Ang produkto sa Ateneo ug Western Kentuck Hiltopper misuway pagsulod sa NBA pinaagi sa pag-apply una sa NBA D-League Draft diin nahimo siyang 109th sa Santa Cruz Warriors.

Apan usa siya sa 20 ka mga magduduwa nga gitangtang sa Warriors.

Nakadisider si Aguilar nga mobalik sa nasod ug gipadayon ang iyang basketball career sa Philippine Basketball Association (PBA).

“I know alam niya ‘yung kailangan niyang gawin. Eh kahit sino namang player, kailangan tuluy-tuloy yung hardwork, tuloy ‘yung grind. I know he knows what he needs to work on,” asoy ni Aguilar kabahin kang Parks.

Matod sa agent ni Parks nga si Charlie Dy nga nakigtambayayong na sila sa bantugang American skills trainer nga si Christopher Thomas sa milabay nga semana sa Indianapolis.

“Nagte-training siya sa US kay Christopher Thomas. And ngayon, may kasabay siyang nagte-train para sa NBA Draft,” matod ni Dy.