NAKAHIGAYON ta sa pagsuhid og maayo sa video tape sa world title fight ni Milan Melindo ug ni Mexican champion Javier Mendoza nga gitapos sa usa ka kontrobersiyal nga technical decision didto sa Mexico niadtong Dominggo.

Atong gibalikbalik og replay ang senaryo sa katapusang 2:39 segundos sa round 6 nga mao usab ang katapusang sinukliay sa kumo tali sa duha.

Tinuod nga adunay gamayng panagsingkil sa ulo ni Melindo ug ni Mendoza niining gutloa apan bisan og kapila pa nako suhira og maayo lisod tuohan nga mao kini hinungdan sa pagkagisi sa tabon-tabon sa walang mata ni Mendoza.

Ang usa ka solido nga right straight ni Melindo nga gisundan og laing kombinasyon maoy nakaantimano og igo ug maoy hinungdan sa pagkagisi niini.

Kon ang headbutt pay nakaingon sa dakong gisi, nganong grabi pa man nga nakigsinukliay sa iyang kinumo si Mendoza ngadto ni Melindo?

Klaro usab kaayo nga wa ideklarar ni referee Gerard White nga headbutt ang nakaingon sa gisi.

Sa dihang gisusi sa ring physician ug nasuta nga halawom ang maong gisi, ug dili na makapadayon sa away si Mendoza nagtuo ang kampo ni Melindo nga daog sila tungod kay legitimate punch man ang nakaigo niini nga maoy nakapaundang sa away.

Pero sukwahi sa ilang gituohan ug mao lay ilang gikasurprisa nga ang mga scores sa tulo ka mga judges maoy gibasehan sa maong desisyon.

Way question sa scores sa mga judges kay gidominar man gyud hinuon ni Mendoza ang kadaghanan sa mga rounds.

Apan sa maong sitwasyon ug ubos sa lagda ug patakaran sa boxing, ang scores sa mga judges dili na mamahimong basehan kon ang legitimate punch na gani ang makapaundang sa away. Dinhing puntoha, dunay igong katarungan ang kampo sa Ala Boxing gym nga moreklamo ug mangayog katin-awan sa International Boxing Federation (IBF) kalabot sa maong hitabo.

Klaro nga ubos sa lagda, si Melindo maoy midaog pinaagi sa technical knockout nga decision. Ang pagdawat sa kapildihan dili maoy isyu sa reklamo kon dili ang pagpangita sa kaanga­yan kon giunsa pag-decide ug paghukom ang maong away.

Kini aron pagprotehir sa interest sa paying public ug labaw sa tanan pagprotehir sa integridad sa boxing. Kinsa pa man unya ang ganahan motan-aw kon magpasuabi lang permi ang pabor-pabor sa desisyon?

Lab-as pa sa atong panumdoman ang nahitabo sa Manny Pacquiao-Floyd Mayweather Jr. fight nga hasta ang mga promoter, boxer ug mga officiating officials gibato sa mga pagbasol.

Panahon na karon nga hinayhinayan na paglimpiyo ang boxing gikan sa mga kuwestiyonabling officials aron mahibalik ang pagsalig sa mga boxing fans.

Panahon na karon nga maghiusa ang mga dagkong haligi sa boxing sa pagwagtang sa mga pagduda. And for the sake of unity in boxing, Melindo deserves a rematch.

(junmigs0622@yahoo.com)